ചെന്നൈ : നടി മഞ്ജിമ മോഹനും നടൻ ഗൗതം കാർത്തിക്കും വിവാഹിതരായി. ചെന്നൈയിലായിരുന്നു വിവാഹം.അടുത്ത സുഹൃത്തുക്കളുടെയും കുടുംബാംഗങ്ങളുടെയും സാന്നിധ്യത്തിലായിരുന്നു വിവാഹം നടന്നത്.സംവിധായകൻ മണിരത്നം, ഗൗതം മേനോൻ, വിക്രം പ്രഭു, ആർകെ സുരേഷ്, ശിവകുമാർ, ഐശ്വര്യ രജനികാന്ത്, അശോക് സെൽവൻ, ആദി, നിക്കി ഗൽറാണി എന്നിവരും വിവാഹത്തിൽ പങ്കെടുത്തു.
കളിയൂഞ്ഞാൽ എന്ന സിനിമയിലൂടെ ബാലതാരമായി വന്ന് നായികയായി മാറിയ വ്യക്തിയാണ് മഞ്ജിമ മോഹൻ. ഒരു വടക്കൻ സെൽഫി എന്ന ചിത്രത്തിന് പിന്നലെ തമിഴിലും തെലുങ്കിലും താരം സജീവമായിരുന്നു.ഛായാഗ്രാഹകൻ വിപിൻ മോഹന്റെയും നർത്തകി കലാമണ്ഡലം ഗിരിജയുടെയും മകളാണ് മഞ്ജിമ മോഹൻ. ഏറെക്കാലമായി തങ്ങൾ പ്രണയത്തിലാണെന്ന് ഗൗതമും മഞ്ജിമയും സാമൂഹ്യമാദ്ധ്യമങ്ങളിലൂടെ മുൻപ് തുറന്നു പറഞ്ഞിരുന്നു.
ഞാൻ എത്രമാത്രം അനുഗ്രഹീതയായിരിക്കുന്നുവെന്ന് തിരിച്ചറിയാൻ ഗൗതം കാർത്തിക് സഹായിച്ചുവെന്നായിരുന്നു പ്രണയം വെളിപ്പെടുത്തി മഞ്ജിമ മോഹൻ എഴുതിയിരുന്നത്. ജീവിതത്തെ കുറിച്ചുള്ള തന്റെ കാഴ്ചപ്പാട് മാറ്റി എന്നും മഞ്ജിമ മോഹൻ എഴുതിയിരുന്നു. നടൻ കാർത്തിക്കിന്റെ മകനാണ് ഗൗതം. മണിരത്നം സംവിധാനം ചെയ്ത കടലിലൂടെയാണ് ഗൗതം കാർത്തിക് സിനിമയിൽ എത്തിയത്. 2019 ൽ ദേവരാട്ടം എന്ന സിനിമയിൽ ഇരുവരും ഒന്നിച്ച് അഭിനയിച്ചിരുന്നു.
