ലക്നൗ : എലിയെ കൊന്നയാൾക്കെതിരെ കേസെടുത്ത് പോലീസ്. ഉത്തർപ്രദേശിലെ ബദോണിലാണ് സംഭവം. സെക്ഷൻ 429,11(1) (1) പ്രകാരം മൃഗങ്ങളോടുള്ള ക്രൂരത തടയുന്ന നിയമത്തിന്മേലാണ് നടപടി. മനോജ് കുമാർ എന്നയാൾക്കെതിരെയാണ് പോലീസ് നടപടിയെടുത്തത്.
വികേന്ദ്ര ശർമ്മ എന്ന മൃഗസ്നേഹി നൽകിയ പരാതിയുടെ അടിസ്ഥാനത്തിലാണ് പോലീസ് കേസ് രജിസ്റ്റർ ചെയ്തത്. നവംബർ 24 നാണ് സർദാർ കോത്വാളി പോലീസ് സ്റ്റേഷനിലെത്തി വികേന്ദ്ര ശർമ്മ പരാതി നൽകിയത്.
മനോജ് കുമാർ എലിയെ കല്ലിൽ കെട്ടിയിട്ട് വെള്ളത്തിൽ മുക്കി കൊലപ്പെടുത്തി എന്നാണ് പരാതി. ഇത് നേരിട്ട് കണ്ട വികേന്ദ്ര ശർമ്മ സംഭവത്തിന്റെ ദൃശ്യങ്ങളും പകർത്തി.
എലിയുടെ പോസ്റ്റ് മോർട്ടം ഇന്ത്യൻ വെറ്റിനറി റിസേർച്ച് ഇൻസ്റ്റിറ്റ്യൂട്ടിൽ വെച്ച് നടത്തി. പോസ്റ്റ്മോർട്ടം റിപ്പോർട്ട് അടുത്ത ദിവസം തന്നെ പുറത്തുവരും.
