ഡോൺ പാലത്തറയുടെ സംവിധാനത്തിൽ വിനയ് ഫോർട്ട് നായകനായി എത്തുന്ന ‘ഫാമിലി’ എന്ന ചിത്രം 52-ാമത് റോട്ടർഡാം അന്താരാഷ്ട്ര ചലച്ചിത്ര മേളയിലേക്ക് തിരഞ്ഞെടുക്കപ്പെട്ടു. വിനയ് ഫോർട്ടിനൊപ്പം ദിവ്യ പ്രഭ, നിൽജ കെ. ബേബി എന്നിവരും ചിത്രത്തപിൽ കേന്ദ്ര കഥാപാത്രങ്ങളെ അവതരിപ്പിക്കുന്നു. നെതർലന്റ്സിൽ ജനുവരി 26 മുതൽ ഫെബ്രുവരി 6 വരെയാണ് ചലച്ചിത്രമേള നടക്കുക. ന്യൂട്ടൺ സിനിമയുടെ ബാനറിൽ സനിറ്റ ചിറ്റിലപ്പിള്ളിയാണ് ചിത്രം നിർമിച്ചിരിക്കുന്നത്. ഡോൺ പാലത്തറയുടെ ആറാമത് ചിത്രമാണ് ‘ഫാമിലി’. കുടുംബങ്ങളിൽ നടക്കുന്ന കുറ്റകൃത്യങ്ങൾ എങ്ങനെ ഒരു മാഫിയ പോലെ അവരുടെ ഉള്ളിൽ വിദഗ്ധമായി കൈകാര്യം ചെയ്യുന്നു എന്ന് ചർച്ച ചെയ്യുന്ന ചിത്രമാണിത്. മാത്രമല്ല, മതവും കുടുംബവും പരസ്പരം എങ്ങനെ സമരസപ്പെട്ടിരിക്കുന്നു എന്ന ചോദ്യവും ചിത്രം മുന്നോട്ട് വയ്‌ക്കുന്നു.
‘മധ്യകേരളത്തിന്റെ ദൃശ്യഭംഗിയും കഥാപാത്രങ്ങളുടെ ജീവിതവും തമ്മിലുള്ള വൈരുധ്യത്തെ സ്ക്രീനിൽ ചിത്രീകരിക്കാൻ ഞങ്ങൾ ശ്രമിച്ചിട്ടുണ്ട്. വ്യത്യസ്തമായ ചലച്ചിത്രാനുഭവം സമ്മാനിക്കുന്ന ചിത്രമായിരിക്കും ‘ഫാമിലി’. ഈ സിനിമ യാഥാർഥ്യമാക്കാൻ ഒപ്പം നിന്ന നിർമ്മാതാവ് ന്യൂട്ടൻ സിനിമയോടും മറ്റെല്ലാ സഹപ്രവർത്തകരോടരും ഞാൻ കടപ്പെട്ടിരിക്കുന്നു. സിനിമയെ അംഗീകരിച്ചു കൊണ്ട് തിരഞ്ഞെടുത്ത ഐഎഫ്എഫ്ആർ- നോടും ഞാൻ നന്ദി രേഖപെടുത്തുന്നു’ എന്ന് ചിത്രത്തിന്റെ രചയിതാവും സംവിധായകനും എഡിറ്ററുമായ ഡോൺ പാലത്തറ പ്രതികരിച്ചു.
‘ഡോൺ പാലത്തറക്ക് വ്യക്തിപരമായി ഏറെ ചേർന്ന് നിൽക്കുന്ന സിനിമയാണ് ഫാമിലി. അതിനാൽ തന്നെ സിനിമ അത്രമേൽ ക്രിയാത്മകവും സത്യസന്ധവുമാണ്’ എന്ന് ചിത്രത്തിൽ കേന്ദ്രകഥാപാത്രത്തെ അവതരിപ്പിച്ച വിനയ് ഫോർട്ട് പറഞ്ഞു. ‘ഐഎഫ്എഫ്ആറിലൂടെ ചിത്രത്തിന്റെ പ്രദർശനം ആരംഭിക്കുന്നത് സന്തോഷകരമായ കാര്യമാണ്. ഒരേ സമയം ധീരവും ക്രിയാത്മകവുമായ സിനിമകൾ ചെയുന്ന ഡോണിനോടൊപ്പം പ്രവർത്തിക്കുവാൻ സാധിച്ചത് അവിസ്മരണീയമായ അനുഭവമായിരുന്നു’ എന്ന് ചിത്രത്തിന്റെ നിർമ്മാതാവ് സനിറ്റ ചിറ്റിലപ്പിള്ളിയും പ്രതികരിച്ചു. ഷെറിൻ കാതറിനാണ് ചിത്രത്തിന്റെ സഹരചയിതാവ്. ജലീൽ ബാദുഷ ഛായാഗ്രഹണം നിർവഹിക്കുന്നു.
Comments