തിരുവനന്തപുരം : കുട്ടിയാനയുടെ കടിയേറ്റ് ആന പാപ്പാന്റെ വിരൽ അറ്റുപോയി. കോട്ടൂർ ആന പരിപാലന കേന്ദ്രത്തിലെ പാപ്പാൻ പുഷ്കരൻ പിള്ളയുടെ വിരലാണ് അറ്റുപോയത്. മറ്റൊരു വിരലിന് ഗുരുതരമായി പരിക്കേറ്റിട്ടുണ്ട്. ആരണ്യ എന്ന കുട്ടിയാനയാണ് പാപ്പാനെ കടിച്ചത്.
ചൊവ്വാഴ്ച വൈകീട്ടായിരുന്നു സംഭവം. മരുന്ന് കൊടുക്കുന്നതിനിടെയാണ് കുട്ടിയാന വിരലിൽ കടിച്ചത്. മരുന്ന് കൊടുക്കുന്നതിനിടെ കൂടിന് സമീപത്തെ മണ്ണുമാന്തി യന്ത്രം സ്റ്റാർട്ട് ചെയ്യുകയായിരുന്നു. ഇതോടെ കുട്ടിയാന കൈയ്യിൽ കടിച്ചു. പരിക്കേറ്റ പാപ്പാനെ ഉടൻ ആശുപത്രിയിൽ എത്തിച്ചെങ്കിലും വിരൽ തുന്നിച്ചേർക്കാനായില്ല. ചതഞ്ഞു വേർപെട്ട നിലയിലായിരുന്നു വിരൽ.
രണ്ട് മാസം മുൻപാണ് ആരണ്യയെ ആന പരിപാലന കേന്ദ്രത്തിലേക്ക് കൊണ്ടുവന്നത്. തളളയാന ചരിഞ്ഞതിനെ തുടർന്ന് കോട്ടൂർ വനത്തിൽ നിന്നാണ് ആരണ്യയെ എത്തിച്ചത്.
