സാവോ പോളോ: ഫുട്‌ബോൾ ഇതിഹാസം പെലെ ആശുപത്രിയിലാണെന്ന വാർത്ത പുറത്തുവന്നതിന് പിന്നാലെ ലോകം മുഴുവൻ ആശങ്കയിലായിരുന്നു. പെലെ വീണ്ടും ഗുരുതരാവസ്ഥയിലാണെന്ന തരത്തിലാണ് വാർത്തകൾ പുറത്തുവന്നത്. അദ്ദേഹത്തിന്റെ ആരോഗ്യനില സംബന്ധിച്ച് നിരവധി ആരാധകരാണ് ആശങ്കകൾ പ്രകടിപ്പിച്ചത്.
തുടർന്ന് അദ്ദേഹത്തിന് പിന്തുണയുമായി ഖത്തറിലെ ഒരു ഗോപുരത്തിൽ പെലെയുടെ ചിത്രത്തിനൊപ്പം ‘ഗെറ്റ് വെൽ സൂൺ’ എന്ന വാചകവും പ്രകാശിപ്പിച്ചിരുന്നു. ഇത് ശ്രദ്ധയിൽപ്പെട്ടതോടെ ആശങ്കാകുലരായ ആരാധകരുടെ പിന്തുണയ്ക്ക് അദ്ദേഹം സമൂഹമാദ്ധ്യമങ്ങൾ വഴി നന്ദി അറിയിച്ചു. താൻ പ്രതിമാസ സന്ദർശനത്തിന്റെ ഭാഗമായാണ് ആശുപത്രിയിലെത്തിയതെന്നും മറ്റ് ആരോഗ്യ പ്രശ്‌നങ്ങൾ ഇല്ലെന്നും അദ്ദേഹം ഇൻസ്റ്റഗ്രാം വഴി അറിയിച്ചു. ഇതുപോലെ പ്രത്യാശ ലഭിക്കുന്ന സന്ദേശങ്ങൾ ലഭിക്കുന്നത് എല്ലായ്‌പ്പോഴും സന്തോഷകരമാണെന്നും ഈ ആദരവിന് ഖത്തറിനും ആരോഗ്യത്തിനായി പ്രാർത്ഥിച്ച എല്ലാവർക്കും അദ്ദേഹം നന്ദി പറഞ്ഞു.
കഴിഞ്ഞ ദിവസമാണ് ശരീരത്തിൽ മുഴുവൻ നീർവീക്കം അനുഭവപ്പെട്ടതിനെ തുടർന്ന് അടിയന്തരമായി ആശുപത്രിയിൽ പ്രവേശിപ്പിച്ചതായി റിപ്പോർട്ട് പുറത്തുവന്നത്. ഹൃദയ സംബന്ധമായ പ്രശ്‌നങ്ങളും അദ്ദേഹത്തെ അലട്ടുന്നതായും വാർത്ത വന്നിരുന്നു. എന്നാൽ അഭ്യൂഹങ്ങൾ തള്ളി മകൾ കെയ്‌ലി നാസിമെന്റോ രംഗത്തെത്തി. അടിയന്തര സാഹചര്യങ്ങളോ ആശങ്കപ്പെടേണ്ട കാര്യങ്ങളോ ഇപ്പോഴില്ലെന്നും മകൾ വ്യക്തമാക്കി.
