കോഴിക്കോട്: പാന്റിന്റെ സിബ്ബിൽ സ്വർണം പൂശി കള്ളക്കടത്ത് നടത്താനുള്ള ശ്രമത്തിനിടെ മലപ്പുറം, പെരിന്തൽമണ്ണ സ്വദേശി മുഹമ്മദ് റംഷാദ് പിടിയിൽ. പാന്റിന്റെ സിബ്ബിന്റെ ഭാഗം സ്വർണ്ണ മിശ്രിതമാക്കി കടത്താനുള്ള ശ്രമമാണ് പോലീസ് കൈയ്യോടെ പിടികൂടിയത്. കരിപ്പൂർ വിമാനത്താവളത്തിന്റെ പുറത്ത് കടന്ന ഇയാളെ സംശയം തോന്നിയ പോലീസ് തടഞ്ഞു നിർത്തി പരിശോധന നടത്തുകയായിരുന്നു.
പാന്റിന്റെ സിബ്ബിന് പുറമേ കാലിലെ സോക്സിനുള്ളിലും ഒളിപ്പിച്ച് സ്വർണം കടത്താൻ റംഷാദ് ശ്രമിച്ചിരുന്നു. ഇതും പോലീസ് വിദഗ്ധമായി പിടികൂടി. 16 ലക്ഷം രൂപയുടെ സ്വർണമാണ് റംഷാദിൽ നിന്നും പോലീസ് പിടികൂടിയത്.
സ്യൂട്ട് കേസിലും ചെരുപ്പിലും ഇലക്ട്രോണിക് ഉപകരണങ്ങളിലും ശരീരത്തിനുള്ളിലും വരെ ഒളിപ്പിച്ച് സ്വർണ്ണക്കടത്ത് നടത്തുന്ന നിരവധി പേരാണ് കരിപ്പൂർ വിമാനത്താവളത്തിൽ പ്രതിദിനം പിടികൂടുന്നത്. സ്വർണ്ണക്കടത്തിന്റെ പുതുവഴികൾ കണ്ട് അക്ഷരാർത്ഥത്തിൽ ഞെട്ടിയിരിക്കുകയാണ് പോലീസ്.
