വാട്സ്ആപ്പിൽ നാം നിരവധി പേർക്ക് മെസേജ് അയക്കാറുണ്ട്. ഫോട്ടോകളും വീഡിയോകളും പങ്കുവെക്കാറുമുണ്ട്. എന്നാൽ നിങ്ങൾ നിങ്ങൾക്ക് തന്നെ മെസേജ് അയച്ചുനോക്കിയിട്ടുണ്ടോ? ചെയ്യാത്തവർ ഇതറിഞ്ഞോളൂ..
നമ്മുടെ ഫോണിൽ കോൺടാക്ട് ലിസ്റ്റിലുള്ളവരിൽ വാട്സ്ആപ്പ് ഇൻസ്റ്റാൾ ചെയ്തവർക്ക് മെസേജ് അയക്കുന്നതുപോലെ തന്നെ നമുക്ക് ഇത് ചെയ്യാവുന്നതാണ്. പ്രധാനപ്പെട്ട വിവരങ്ങൾ പങ്കുവെക്കാനും സേവ് ചെയ്ത് വെക്കേണ്ട ഫയലുകളും ഡോക്യുമെന്റ്സും അയച്ചിടാനും ടു-ഡു ലിസ്റ്റ് തയ്യാറാക്കാനുമെല്ലാം നമുക്ക് നമ്മുടെ സ്വന്തം ചാറ്റ്ബോക്സ് തയ്യാറാക്കാം.
സന്ദേശമയക്കുന്നയാളും സ്വീകരിക്കുന്നയാളും ഒന്നുതന്നെയാണെന്നതാണ് ഇതിന്റെ പ്രത്യേകത. ഇതിനായി ചെയ്യേണ്ടത് ഇത്രമാത്രം..
വാടസ്ആപ്പ് തുറക്കുക. പുതിയ സന്ദേശങ്ങൾ അയക്കുന്നതിനായി കീഴെ വലതുവശത്ത് കാണുന്ന ഐക്കണിൽ ക്ലിക്ക് ചെയ്യുക. ഇപ്പോൾ വരുന്ന കോൺടാക്ട് ലിസ്റ്റിൽ ആദ്യം തന്നെ നിങ്ങളുടെ നമ്പർ കാണാൻ കഴിയും. അതിൽ ക്ലിക്ക് ചെയ്ത് മെസേജ് അയക്കാവുന്നതാണ്.
അതുമല്ലെങ്കിൽ കോൺടാക്ട് ലിസ്റ്റിൽ നിങ്ങളുടെ മൊബൈൽ നമ്പർ ആദ്യം സേവ് ചെയ്യുക. ഫോണിലെ കോൺടാക്ട്സിൽ ചെന്ന് നിങ്ങളുടെ നമ്പർ തിരഞ്ഞെടുക്കുക. അവിടെ വാട്സ്ആപ്പ് മെസേജ് അയക്കുന്നതിനുള്ള ഓപ്ഷൻ കാണാം. ഇതുക്ലിക്ക് ചെയ്താൽ നിങ്ങൾ നേരിട്ട് വാട്സ്ആപ്പിലേക്ക് പോകുകയും നിങ്ങളുടെ സ്വന്തം കോൺടാക്ട് നമ്പറിന്റെ വാട്സാപ്പ് ചാറ്റ് ലഭിക്കുകയും ചെയ്യും. പേര് സേവ് ചെയ്തതിന് ബ്രാക്കറ്റിലായി you എന്നും എഴുതിയിരിക്കും. ഇത്തരത്തിൽ സ്വന്തം ചാറ്റ്ബോക്സിൽ മെസേജ് അയക്കാവുന്നതാണ്.
