തിരുവനന്തപുരം: സംസ്ഥാന കായിക മേളയ്ക്കിടെ മരച്ചില്ല ഒടിഞ്ഞു വീണ് ഒരു കുട്ടിക്ക് പരിക്ക്. കാണികൾ ഇരിക്കുന്നിടത്തേയ്‌ക്കാണ് മരച്ചില്ല ഒടിഞ്ഞു വീണത്. യൂണിവേഴ്‌സിറ്റി സ്റ്റേഡിയത്തിൽ മത്സരങ്ങൾ നടന്നു കൊണ്ടിരിക്കുമ്പോഴായിരുന്നു സംഭവം. അഗ്നിരക്ഷസേന അംഗങ്ങൾ സ്ഥലത്തെത്തി മരച്ചില്ല മുറിച്ചു മാറ്റി. മന്ത്രി വി.ശിവൻകുട്ടിയും സംഭവ സ്ഥലം സന്ദർശിച്ച് കാര്യങ്ങൾ വിലയിരുത്തി.
അഫിത കെ.പി എന്ന കുട്ടിക്കാണ് മരച്ചില്ല ഒടിഞ്ഞു വീണ് പരിക്കേറ്റതെന്ന് മന്ത്രി ശിവൻകുട്ടി പറഞ്ഞു. കുട്ടിക്ക് നിസാര പരിക്കുകൾ മാത്രമാണുള്ളത്. അഫിതയുടെ കായിക ഇനങ്ങൾ എല്ലാം കഴിഞ്ഞതാണ്. കുട്ടിയെ ജനറൽ ആശുപത്രിയിൽ പ്രവേശിപ്പിച്ചു എന്നും മെഡിക്കൽ കോളേജിൽ എത്തിച്ച് വിദഗ്ദ പരിശോധന നടത്താൻ നിർദ്ദേശം നൽകിയിട്ടുണ്ട് എന്നും മന്ത്രി വ്യക്തമാക്കി.
അതേസമയം, അറുപത്തിനാലാമത് സംസ്ഥാന സ്‌കൂൾ കായിക മേളയ്‌ക്കാണ് ഡിസംബർ 3-ന് തുടക്കം കുറിച്ചത്. തിരുവനന്തപുരം ചന്ദ്രശേഖരൻ നായർ സ്റ്റേഡിയം, യൂണിവേഴ്‌സിറ്റി സ്റ്റേഡിയം എന്നിവിടങ്ങളിലായാണ്‌ കായിക മേള നടക്കുന്നത്. ഡിസംബർ 3 മുതൽ 6 വരെയാണ് കായിക മേള. നാലു വർഷത്തെ ഇടവേളയ്‌ക്ക് ശേഷമാണ് തലസ്ഥാന നഗരി കായികോത്സവത്തിന് ആതിഥേയരാവുന്നത്. ഇത്തവണത്തെ കായികോത്സവം പകലും രാത്രിയുമായി നടത്തുന്നുവെന്ന ഒരു പ്രത്യേകത കൂടിയുണ്ട്.
