ന്യൂഡൽഹി: ബഡ്ജറ്റ് സ്മാർട്ട് ഫോൺ പ്രേമികളുടെ കാത്തിരിപ്പിന് വിരാമമിട്ട് വൻ വിലക്കുറവിൽ ചൈനീസ് കമ്പനിയായ വിവോയുടെ പുതിയ മോഡൽ ഇന്ത്യയിലെത്തി. വിവോ വൈ02 എന്ന പേരിൽ പുറത്തിറങ്ങിയിരിക്കുന്ന ഈ ഫോണിന്റെ വിശേഷങ്ങൾ അറിയാം.
ഫോണിന്റെ ഒരു പതിപ്പ് മാത്രമാണ് നിലവിൽ വിവോ ഇന്ത്യയിൽ അവതരിപ്പിച്ചിരിക്കുന്നത്. ഓർക്കിഡ് ബ്ലൂ, കോസ്മിക് ഗ്രേ തുടങ്ങി രണ്ട് നിറങ്ങളിൽ വിവോ വൈ02 ലഭ്യമാണ്. ഓൺലൈനിലും അംഗീകൃത റീട്ടെയിൽ ഷോപ്പുകളിലും ഫോൺ ലഭ്യമാണ്.
6.51 ഇഞ്ച് എച്ച് ഡി പ്ലസ് ഡിസ്പ്ലേ ആണ് കമ്പനി ഫോണിന് നൽകിയിരിക്കുന്നത്. 720×1600 പിക്സൽ റെസല്യൂഷൻ ഡിസ്പ്ലേക്ക് ഉണ്ട്. 20:9 ആണ് ആസ്പെക്ട് റേഷ്യോ. കാഴ്ചാനുഭവം സുരക്ഷിതമാക്കുന്നതിന്, ഐ പ്രൊട്ടക്ഷൻ മോഡും കമ്പനി ഡിസ്പ്ലേക്ക് നൽകുന്നുണ്ട്.
3ജിബി റാമും 32ജിബി ഇന്റേണൽ മെമ്മറിയുമുള്ള വിവോ വൈ02 ഫോണിൽ, മൈക്രോ എസ് ഡി കാർഡ് ഉപയോഗിച്ച് മെമ്മറി 1ടിബി വരെ വർദ്ധിപ്പിക്കാം. ആൻഡ്രോയ്ഡ് 12 ഓപ്പറേറ്റിംഗ് സിസ്റ്റത്തിൽ പ്രവർത്തിക്കുന്ന ഫോണിന് വിവോയുടെ സ്വന്തം പ്ലാറ്റ്ഫോമായ വൺ ടച്ച് ഓഎസ് 12 പിന്തുണ നൽകുന്നു. സിംഗിൾ ലെൻസ് 8 മെഗാ പിക്സൽ റിയർ കാമറയുള്ള ഫോണിന് 5 മെഗാ പിക്സൽ ഫ്രണ്ട് കാമറയാണ് ഉള്ളത്. ടൈം ലാപ്സ്, ബൊക്കെ മോഡ്, ഫേസ് ബ്യൂട്ടി എന്നീ സംവിധാനങ്ങളും കാമറയുടെ അനുബന്ധ ഫീച്ചറുകളായി ലഭ്യമാണ്.
5000 mAh ബാറ്ററിയാണ് കമ്പനി ഫോണിൽ ഉൾപ്പെടുത്തിയിരിക്കുന്നത്. ഒറ്റ ഫുൾ ചാർജിൽ ഒരു ദിവസം മുഴുവൻ ഫോൺ ഉപയോഗിക്കാൻ സാധിക്കുമെന്നാണ് കമ്പനി വാഗ്ദാനം ചെയ്യുന്നത്. ജിപിഎസ് കൃത്യതയ്ക്ക് വേണ്ടി ഇലക്ട്രോണിക് കോമ്പസ്, ഫേസ് വേക്ക്, ഈസി ഷെയർ, ഐ മാനേജർ തുടങ്ങി നിരവധി ഫീച്ചറുകളും ഫോണിൽ ലഭ്യമാണ്.
ബജറ്റ് ഫ്രണ്ട്ലി സ്മാർട്ട് ഫോൺ വിഭാഗത്തിൽ പെടുന്ന വിവോ വൈ02 8,999 രൂപയ്ക്കാണ് വിപണിയിൽ ലഭ്യമാകുക. നിലവിൽ ജനപ്രിയ ബഡ്ജറ്റ് ഫ്രണ്ട്ലി വിപണിയിൽ ഏറെ പ്രിയങ്കരമായ റെഡ്മി എ വൺ പ്ലസിന് കനത്ത വെല്ലുവിളി ഉയർത്താൻ പര്യാപ്തമായ സ്മാർട്ട് ഫോണാണ് വിവോ വൈ02.
