മലപ്പുറം: കരിപ്പൂർ വിമാനത്താവളം വഴി വീണ്ടും സ്വർണം കടത്താൻ ശ്രമം. സംഭവത്തിൽ മഞ്ചേരി സ്വദേശി താഹിറിനെ പോലീസ് പിടികൂടി. ഇയാളുടെ പക്കൽ നിന്നു ഒരു കിലോ സ്വർണവും പോലീസ് പിടിച്ചെടുത്തിട്ടുണ്ട്.
വിമാനത്താവളത്തിന്റെ പരിസരത്ത് നിന്നാണ് ഇയാളെ പിടികൂടിയത്.
മലദ്വാരത്തിൽ ഒളിപ്പിച്ചായിരുന്നു ഇയാൾ സ്വർണം കടത്താൻ ശ്രമിച്ചത്. വിമാനത്താവളത്തിൽ നടത്തിയ സുരക്ഷാ പരിശോധനയ്ക്കിടെ സ്വർണം കണ്ടെത്താൻ അധികൃതർക്ക് കഴിഞ്ഞില്ല. ഇതിന് ശേഷം പുറത്തിറങ്ങിയ ഇയാളെ സംശയം തോന്നിയ പോലീസ് നിരീക്ഷിക്കുകയായിരുന്നു. താഹിറിനെ കൊണ്ടുപോകാൻ ബന്ധുക്കൾ വാഹനവുമായി എത്തിയിരുന്നു. ഇതിൽ കയറുന്നതിനിടെ പോലീസ് പിടികൂടുകയായിരുന്നു.
ചോദ്യം ചെയ്തപ്പോൾ ആദ്യം ഇയാൾ കുറ്റം നിഷേധിച്ചു. എന്നാൽ പിന്നീട് നടത്തിയ എക്സ്റേ പരിശോധനയിൽ സ്വർണം കണ്ടെത്തുകയായിരുന്നു. സ്വർണം ക്യാപ്സൂൾ രൂപത്തിലാക്കിയാണ് ഇയാൾ മലദ്വാരത്തിൽ ഒളിപ്പിച്ചത്. നാല് ക്യാപ്സൂളുകൾ ഇയാളുടെ പക്കൽ നിന്നും പിടിച്ചെടുത്തു. പിടിച്ചെടുത്ത സ്വർണത്തിന് വിപണിയിൽ 54 ലക്ഷം രൂപ വിലവരുമെന്ന് പോലീസ് അറിയിച്ചു.
Comments