ജയ്പൂർ: ഗുജറാത്തിലെ കനത്ത പരാജയത്തോട് പ്രതികരിച്ച് കോൺഗ്രസ് നേതാവ് രാഹുൽ ഗാന്ധി. ജനഹിതം അംഗീകരിക്കുന്നതായി രാഹുൽ ഗാന്ധി പറഞ്ഞു. തിരഞ്ഞെടുപ്പിന്റെ അന്തിമ ഫലം വന്നതിന് പിന്നാലെ ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം.
ഗുജറാത്തിലെ ജനഹിതം അംഗീകരിക്കുന്നു. കോൺഗ്രസ് ഉടച്ചുവാർക്കും. കൂടുതൽ കഠിനമായി പ്രവർത്തിക്കും. രാജ്യത്തിന്റെ താത്പര്യങ്ങൾക്കായും ഗുജറാത്തിലെ ജനങ്ങളുടെ അവകാശത്തിന് വേണ്ടിയും കൂടുതൽ പ്രയത്നിക്കുമെന്നും രാഹുൽ ഗാന്ധി പ്രതികരിച്ചു. അതേസമയം ഹിമാചൽപ്രദേശിലെ ജനങ്ങൾക്ക് രാഹുൽ ഗാന്ധി നന്ദി പറഞ്ഞു.
ഗുജറാത്തിൽ ഞെട്ടിക്കുന്ന തോൽവിയാണ് കോൺഗ്രസിന് ഏറ്റുവാങ്ങേണ്ടി വന്നത്. കഴിഞ്ഞ തിരഞ്ഞെടുപ്പിൽ 77 സീറ്റുകൾ നേടിയ കോൺഗ്രസ് ഇക്കുറി 17 സീറ്റുകളിലേക്ക് ചുരുങ്ങി. നിലവിൽ ഭാരത് ജോഡോ യാത്രയിൽ മുഴുകിയിരിക്കുന്ന രാഹുൽ ഗാന്ധിയ്ക്ക് ഗുജറാത്തിൽ വലിയ ശ്രദ്ധ കേന്ദ്രീകരിക്കാൻ കഴിഞ്ഞിരുന്നില്ല. ഇതും കോൺഗ്രസിന്റെ തിരിച്ചടിയ്ക്ക് കാരണമായിട്ടുണ്ട്. ഈ സാഹചര്യത്തിൽ വരും ദിവസങ്ങളിൽ രാഹുലിനെതിരെ ശക്തമായ വിമർശനം ഉയരാനാണ് സാദ്ധ്യത.
Comments