പാരീസ്: യുവജനങ്ങൾക്കിടയിൽ പലപ്പോഴും സംഭവിക്കുന്ന ‘ആഗ്രഹിക്കാത്ത ഗർഭധാരണം’ ഒഴിവാക്കാൻ നടപടിയുമായി ഫ്രഞ്ച് സർക്കാർ. 18നും 25നും ഇടയിൽ പ്രായമുള്ളവർക്ക് സൗജന്യ ഗർഭനിരോധന ഉറകൾ ലഭ്യമാക്കുമെന്ന് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ പ്രഖ്യാപിച്ചു. വരുന്ന ജനുവരി ഒന്ന് മുതൽ ഇത് ലഭ്യമാകും
രാജ്യത്ത് 2020-21 കാലയളവിൽ എസ്ടിഡി (STD) നിരക്ക് (സുരക്ഷിതമല്ലാത്ത ലൈംഗിക ബന്ധത്തിലൂടെ പിടിപെടുന്ന രോഗങ്ങൾ) 30 ശതമാനത്തോളം വർദ്ധിച്ചിട്ടുണ്ടെന്നാണ് കണക്കുകൾ സൂചിപ്പിക്കുന്നത്. ഇതിന്റെ ഭാഗമായി 2022 തുടക്കത്തിൽ 25 വയസിൽ താഴെയുള്ള യുവതികൾക്ക് ഗർഭനിരോധന ഉറകൾ സൗജന്യമായി വിതരണം ചെയ്തിരുന്നു. എയ്ഡ്സ് അടക്കമുള്ള എസ്ടിഡി രോഗങ്ങൾ നിയന്ത്രിക്കുന്നതിനായി ആരോഗ്യമന്ത്രാലയം കൂടുതൽ നടപടികൾ ആരംഭിക്കുകയും ചെയ്തു.
ഇതിന് പിന്നാലെയാണ് പുതിയ പ്രഖ്യാപനവുമായി പ്രസിഡന്റ് രംഗത്തെത്തിയത്. യുവാക്കൾക്ക് ഫാർമസികളിൽ നിന്നാണ് ഗർഭനിരോധന ഉറകൾ സൗജന്യമായി ലഭിക്കുക. ഒരു തരത്തിൽ വിപ്ലവകരമായ ചുവടുവയ്പ്പാണിതെന്നും മാക്രോൺ പ്രതികരിച്ചു. ലൈംഗിക വിദ്യാഭ്യാസത്തെക്കുറിച്ച് നമ്മിൽ ഭൂരിഭാഗം പേരും ഇപ്പോഴും അജ്ഞരാണ്. തിയറികളിൽ നിന്ന് ഏറെ വ്യത്യസ്തമാണ് യാഥാർത്ഥ്യം. നമ്മുടെ അദ്ധ്യാപകർ കൂടുതൽ അറിവ് സമ്പാദിക്കേണ്ട മേഖലയാണ് ലൈംഗിക വിദ്യാഭ്യാസമെന്നും ഫ്രഞ്ച് പ്രസിഡന്റ് പറഞ്ഞു.
ഗർഭനിരോധന ഉറകളുടെ പ്രാധാന്യത്തെക്കുറിച്ച് ഏറെ കാലം മുതൽ തന്നെ ഫ്രാൻസിൽ സർക്കാർ ക്യാമ്പയിനുകൾ ശക്തമായിരുന്നു. എയ്ഡ്സ് വ്യാപനം തടയുന്നതിനായി ഗർഭനിരോധന സംവിധാനം ഉപയോഗിക്കേണ്ടതിന്റെ ആവശ്യകത വ്യക്തമാക്കുന്ന അഞ്ച് അശ്ലീല സിനിമകൾ ഉൾപ്പെടെ ഫ്രഞ്ച് സർക്കാർ പുറത്തിറക്കിയിട്ടുണ്ട്. 1998ലായിരുന്നു സംഭവം. യുവാക്കളിലേക്ക് ബോധവത്കരണം എത്തിക്കുകയെന്നതായിരുന്നു സർക്കാരിന്റെ ലക്ഷ്യം.
Comments