തിരുവനന്തപുരം: തലസ്ഥാനത്ത് വീണ്ടും വൻ കഞ്ചാവ് വേട്ട. ഒമ്നി വാനിനുള്ളിൽ ഒളിപ്പിച്ചു കടത്തുന്നതിനിടയിൽ യുവാവ് പിടിയിൽ. പെരുനെല്ലി ചന്തയ്ക്ക് സമീപം ടി സി 43/1718 പുതുവൽ പുത്തൻവീട്ടിൽ പ്രമോദ് (23) ആണ് പിടിയിലായത്. കഴിഞ്ഞ ദിവസം രാത്രി പത്തരയോടെ ബീമാപള്ളി ഈസ്റ്റ് വാർഡ് ബദരിയാ നഗർ ഭാഗത്ത് വെച്ചാണ് ഇയാളെ പൂന്തുറ പോലീസ് പിടികൂടിയത്. ഒപ്പമുണ്ടായിരുന്ന ബദരിയ നഗർ സ്വദേശി അബ്ദുള്ള ഓടി രക്ഷപ്പെട്ടു.
സംശയാസ്പദമായ സാഹചര്യത്തിൽ കണ്ട പ്രമോദിനെയും അബ്ദുള്ളയെയും പോലീസ് തടഞ്ഞുനിർത്തുകയായിരുന്നു. പിന്നാലെ ഇവർ സഞ്ചരിച്ച മാരുതി ഒമ്നി വാൻ പോലീസ് പരിശോധിച്ചു. തുടർന്ന് സീറ്റിനടിയിലും പുറകുവശത്തും ഒളിപ്പിച്ച നിലയിൽ 15 കിലോ കഞ്ചാവ് കണ്ടെത്തുകയായിരുന്നു. രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന.
ഒമ്നി വാനിലെ സീറ്റിനടിയിൽ 8 വലിയ പൊതികളിലായിട്ടായിരുന്നു 15 കിലോ കഞ്ചാവ് സൂക്ഷിച്ചിരുന്നത്.
Comments