ഡബ്ലിൻ: കണ്ണിൽ ടാറ്റൂ ചെയ്തതോടെ കാഴ്ച ശക്തി നഷ്ടപ്പെട്ടുകൊണ്ടിരിക്കുകയാണെന്ന് യുവതി. ഓസ്ട്രേലിയൻ മോഡലായ ആംബെർ ലൂക്കിനെ പോലെയാകുന്നതിന് വേണ്ടി അയർലൻഡിൽ നിന്നുള്ള യുവതിയായിരുന്നു കണ്ണിൽ വ്യത്യസ്ത നിറം ടാറ്റൂ അടിച്ചത്.
അഞ്ച് മക്കളുടെ അമ്മ കൂടിയായ 32-കാരി അനായ പീറ്റേഴ്സൺ മുന്നറിയിപ്പുകളെ അവഗണിച്ചായിരുന്നു ടാറ്റൂ ചെയ്യാൻ പുറപ്പെട്ടത്. കണ്ണിനുള്ളിൽ ടാറ്റൂ ചെയ്യരുതെന്ന് പലരും പറഞ്ഞെങ്കിലും, അന്ധയാകാനുള്ള സാധ്യത പലരും ചൂണ്ടിക്കാട്ടിയെങ്കിലും അതെല്ലാം കണ്ടില്ലെന്ന് നടിച്ചായിരുന്നു അനായ തന്റെ ആഗ്രഹം സഫലമാക്കിയത്. പ്രചോദനമേകിയ ഓസ്ട്രേലിയൻ മോഡൽ ആംബർ ലൂക്കിനും കണ്ണിനുള്ളിൽ ടാറ്റൂ അടിച്ചത് കാഴ്ച ശക്തിയെ ബാധിച്ചിരുന്നു. 2019ലായിരുന്നു പ്രശസ്ത മോഡലായിരുന്ന ലൂക്ക് രണ്ട് കണ്ണിലും വ്യത്യസ്ത നിറം ടാറ്റൂ ചെയ്തത്. മോഡലിന് സംഭവിച്ചത് അറിഞ്ഞിട്ടും തന്റെ ലക്ഷ്യവുമായി മുന്നോട്ട് പോകുകയായിരുന്നു അനായ പീറ്റേഴ്സൺ.
തുടർന്ന് 2020 ജൂലൈയിൽ അനായ തന്റെ രണ്ടു കണ്ണുകളും ടാറ്റൂ ചെയ്തു. ഒരു കണ്ണിൽ പച്ച നിറവും മറുകണ്ണിൽ പർപ്പിൾ നിറവുമാണ് ടാറ്റൂവിനായി ഉപയോഗിച്ചത്. ഇതിന് ശേഷം അസഹനീയമായ തലവേദനയും കണ്ണുകൾ സദാസമയം വരണ്ടുപോകുന്ന അവസ്ഥയും യുവതിക്ക് അനുഭവപ്പെടാൻ തുടങ്ങി. എന്നാൽ കുറച്ച് മാസങ്ങൾക്ക് ശേഷം കണ്ണ് വീങ്ങി വീർക്കാൻ തുടങ്ങി. ഇതോടെ അനായ ആശുപത്രിയിൽ എത്തി ചികിത്സ തേടി. യുവതിയുടെ കാഴ്ച ശക്തി കുറഞ്ഞുവരികയാണെന്ന് പരിശോധനകളിൽ നിന്ന് വ്യക്തമായി.
പൂർണമായും അന്ധയാകുന്നത് തടയാൻ പരിഹാര മാർഗങ്ങൾ നിർദേശിക്കാനും ഡോക്ടർമാർക്ക് സാധിച്ചില്ല. മുന്നറിയിപ്പുകളെ അവഗണിച്ച് ടാറ്റൂ ചെയ്തതിൽ വളരെയധികം ഖേദിക്കുന്നുവെന്നായിരുന്നു അനായയുടെ പ്രതികരണം. ഭാവിയിൽ ഒരു ദിവസം കണ്ണിന്റെ കാഴ്ച പൂർണമായും നഷ്ടപ്പെടുമെന്ന യാഥാർത്ഥ്യത്തെ അംഗീകരിക്കുകയാണെന്നും വലിയ അബദ്ധമായിരുന്നു ചെയ്തതെന്നും യുവതി പ്രതികരിച്ചു.
