വാഷിംഗ്ടൺ: ചരിത്രപരമായ നിയമനിർമ്മാണവുമായി അമേരിക്ക. യുഎസിൽ സ്വവർഗ വിവാഹങ്ങൾ സംരക്ഷിക്കുന്ന നിയമത്തിൽ പ്രസിഡന്റ് ജോ ബൈഡൻ ഒപ്പുവച്ചു. പുതിയ നിയമം പ്രാബല്യത്തിലാവുന്നതോടെ സ്ത്രീയും പുരുഷനും തമ്മിലുള്ള വിവാഹത്തെ നിർവചിച്ചിരുന്ന ഡിഫൻസ് ഓഫ് മാര്യേജ് ആക്ട് ഔദ്യോഗികമായി അസാധുവാകും. യുഎസിലെ ഒരു ഐക്യനാടിനും ഇനി സ്വവർഗവിവാഹങ്ങളെ തടയാൻ സാധിക്കില്ല.
വൈറ്റ് ഹൗസിലെ സൗത്ത് സോണിൽ നടന്ന ചടങ്ങിൽ നിരവധി പേരുടെ സാന്നിധ്യത്തിലാണ് ജോ ബൈഡൻ സുപ്രധാന നിയമത്തിൽ ഒപ്പ് വച്ചത്. പുതിയ നിയമവും സ്‌നേഹവും എല്ലാ തരത്തിലുമുള്ള വിദ്വേഷത്തെ പ്രതിരോധിക്കുകയും പ്രഹരമേൽപ്പിക്കുകയും ചെയ്യും. അത് കൊണ്ടാണ് ഈ നിയമം എല്ലാ അമേരിക്കകാർക്കും പ്രാധാന്യമേറിയതെന്ന് നിയമത്തിൽ ഒപ്പ് വച്ചതിന് ശേഷം ജോ ബൈഡൻ പറഞ്ഞു.
നവംബർ അവസാന വാരമാണ് സ്വവർഗവിവാഹത്തിന് അനുമതി നൽകിയുള്ള ബിൽ യുഎസ് സെനറ്റ് പാസാക്കിയത്. സ്നേഹം സ്നേഹമാണ്, അമേരിക്കക്കാർക്ക് അവർ ഇഷ്ടപ്പെടുന്ന വ്യക്തിയെ വിവാഹം കഴിക്കാനുള്ള അവകാശം ഉണ്ടായിരിക്കണമെന്ന് ചൂണ്ടിക്കാട്ടിയായിരുന്നു ബിൽ പാസാക്കിയത്. സ്വവർഗവിവാഹം രാജ്യവ്യാപകമായി നിയമവിധേയമാക്കിയ 2015 ലെ വിധി സുപ്രീംകോടതി അസാധുവാക്കുമെന്ന ആശങ്കയെ തുടർന്നായിരുന്നു സെനറ്റിന്റെ പെട്ടെന്നുള്ള നടപടി. 61 സെനറ്റ് അംഗങ്ങൾ ബില്ലിനെ അനുകൂലിച്ചും 36 പേർ എതിരെയും വോട്ട് ചെയ്തിരുന്നു.
