ആലപ്പുഴ: വനിതാ നേതാവിനെ ജാതിവിളിച്ച് അധിക്ഷേപിച്ച സംഭവം എംഎൽഎയ്ക്കും ഭാര്യയ്ക്കുമെതിരെ കേസ്. എൻസിപി നേതാവും കുട്ടനാട് എംഎൽഎയുമായ തോമസ് കെ തോമസ്, ഭാര്യ ഷേർലി തോമസ് എന്നിവർക്കെതിരെയാണ് കേസ് എടുത്തത്. നാഷണലിസ്റ്റ് മഹിളാ കോൺഗ്രസ് നേതാവ് ആർ.ബി ജിഷയെയാണ് ഇരുവരും ജാതി പറഞ്ഞ് അധിക്ഷേപിച്ചത്.
ജിഷ നൽകിയ പരാതിയിലാണ് നടപടി. പട്ടികജാതി പീഡന നിരോധന നിയമ പ്രകാരമാണ് ഇരുവർക്കുമെതിരെ കേസ് എടുത്തത്. തോമസിനെ ഒന്നാം പ്രതിയാക്കിയും ഭാര്യയെ രണ്ടാം പ്രതിയാക്കിയുമാണ് കേസ് രജിസ്റ്റർ ചെയ്തിരിക്കുന്നത്. അധിക്ഷേപിക്കുന്നതിന്റെ ദൃശ്യങ്ങൾ സഹിതമാണ് ജിഷ പോലീസിൽ പരാതി നൽകിയത്.
ഈ മാസം ഒൻപതിനായിരുന്നു സംഭവം. ഹരിപ്പാട് നടന്ന എൻസിപി ഫണ്ട് സമാഹരണ യോഗത്തിനിടെ വാക്കുതർക്കം ഉടലെടുത്തിരുന്നു. ഇതിനിടെയാണ് ജിഷയെ അധിക്ഷേപിച്ചത്. മണ്ഡലത്തിന് പുറത്തുള്ളവർ യോഗത്തിൽ പങ്കെടുക്കരുതെന്ന് ജിഷ ആവശ്യപ്പെട്ടിരുന്നു. ഇതാണ് എംഎൽഎയെ ചൊടിപ്പിച്ചത്. ജിഷയെ കാക്കയെ പോലെ കറുത്തവൾ എന്ന് വിളിക്കുയും, ജാതി പറഞ്ഞ് അധിക്ഷേപിക്കുകയുമായിരുന്നു.
Comments