ന്യൂയോർക്ക് : ഐക്യരാഷ്ട്ര സഭ ആസ്ഥാനത്ത് മഹാത്മാ ഗാന്ധിയുടെ പ്രതിമ സ്ഥാപിച്ചു. ന്യൂയോർക്കിലെ യുഎൻ ആസ്ഥാനത്ത് വിദേശകാര്യ മന്ത്രി എസ് ജയശങ്കർ പ്രതിമ അനാച്ഛാദനം ചെയ്തു.
‘സമാധാനപരമായ സഹവർത്തിത്വത്തിനായി പ്രവർത്തിച്ച വിട്ടുവീഴ്ചയില്ലാത്ത വക്താവ്’ എന്നാണ് യുഎൻ സെക്രട്ടറി അന്റോണിയോ ഗുട്ടറസ് ഗാന്ധിജിയെ വിശേഷിപ്പിച്ചത്. ഗാന്ധിജി ഉയർത്തിപ്പിടിച്ച മൂല്യങ്ങളുടെ ഓർമ്മപ്പെടുത്തലാണ് യുഎൻ ആസ്ഥാനത്ത് സ്ഥാപിച്ച പ്രതിമയെന്നും അന്റോണിയോ ഗുട്ടറസ് പറഞ്ഞു.
വിദേശകാര്യമന്ത്രി എസ്. ജയശങ്കറാണ് പ്രതിമ അനാച്ഛാദനം ചെയ്തത്. യുഎൻ പൊതുസഭയുടെ 77-ാമത് സെഷൻ പ്രസിഡന്റ് സിസാബ കൊറോസിയും യുഎന്നിലെ ഇന്ത്യയുടെ സ്ഥിരം പ്രതിനിധി രുചിര കാംബോജും ചടങ്ങിൽ പങ്കെടുത്തു. മഹാത്മഗാന്ധിയുടെ പ്രിയപ്പെട്ട ഭജൻ ‘ വൈഷ്ണവ് ജാൻ തോ’ ചടങ്ങിൽ പരായണം ചെയ്തു. യുഎൻ ആസ്ഥാനത്ത് ആദ്യമായാണ് ഗാന്ധി പ്രതിമ സ്ഥാപിക്കുന്നത്. ഇന്ത്യ സമ്മാനിച്ച ഗാന്ധി പ്രതിമയാണ് സ്ഥാപിച്ചത്. പത്മശ്രീ ജേതാവും ഇന്ത്യൻ ശിൽപിയുമായ റാം സുതാറാണ് പ്രതിമ നിർമ്മിച്ചത്.
