ന്യൂഡൽഹി: പ്രധാനമന്ത്രി നരേന്ദ്ര മോദിയെ അപകീർത്തിപ്പെടുത്തിയ പാക് മന്ത്രിയുടെ വിവാദപരമായ പരമാർശത്തിനെതിരെ ഇന്ന് രാജ്യവ്യാപകമായ പ്രതിഷേധം സംഘടിപ്പിക്കും. ബിജെപിയുടെ നേതൃത്വത്തിലാകും പ്രതിഷേധം നടത്തുക. പ്രധാനമന്ത്രിയ്‌ക്കെതിരെ പാകിസ്താൻ വിദേശകാര്യ മന്ത്രി ബിലാവൽ ഭൂട്ടോ സർദാരി നടത്തിയ അപകീർത്തികരമായ പരാമർശത്തിനെതിരെയാണ് പ്രതിഷേധം സംഘടിപ്പിക്കുന്നത്.
എല്ലാ സംസ്ഥാന തലസ്ഥാനങ്ങളിലും പ്രതിഷേധം നടക്കും. ഇവിടങ്ങളിൽ പാക് മന്ത്രിയുടെ കോലം കത്തിച്ചാകും പ്രവർത്തകർ പ്രതിഷേധിക്കുക. വിദേശകാര്യമന്ത്രിയുടെ ലജ്ജാകരമായ പരാമശത്തെ അപലപിക്കുന്നതായി ബിജെപി വ്യക്തമാക്കിയിരുന്നു. പാകിസ്താൻ ദിനംപ്രതി തകർന്നുകൊണ്ടിരിക്കുകയാണെന്നും അരാജകത്വം, നിയമ ലംഘനങ്ങൾ തുടങ്ങിയവയിൽ നിന്ന് ലോക ശ്രദ്ധ തിരിക്കാനായാണ് ഇത്തരം പരാമർശം നടത്തിയതെന്നും ബിജെപി നേതൃത്വം ആരോപിച്ചു.
ഐക്യരാഷ്‌ട്രസഭയിൽ നടത്തിയ വാർത്താ സമ്മേളനത്തിനിടയിലാണ് ബിലാവൽ ഭൂട്ടോ അപകീർത്തികരമായ പരാമർശം നടത്തിയത്. പ്രസ്താവനയെ അപലപിച്ച് ഡൽഹിയിലെ പാകിസ്താൻ ഹൈക്കമീഷന് മുൻപിൽ ബിജെപി പ്രവർത്തകർ പ്രതിഷേധ പ്രകടനം നടത്തിയിരുന്നു. ഇതിന് പിന്നാലെയാണ് രാജ്യവ്യാപകമായി പ്രതിഷേധം സംഘടിപ്പിക്കുന്നത്.
