ഒഡീഷ : മത്സരത്തിനിടെ വിദ്യാർത്ഥിയുടെ കഴുത്തിൽ ജാവ്ലിൻ തുളച്ചുകയറി. ഒഡീഷയിലെ ബലംഗീർ ജില്ലയിലെ സർക്കാർ സ്കൂളിലാണ് സംഭവം. ഒൻപതാം ക്ലാസ് വിദ്യാർത്ഥിയായ സദാനന്ദ മെഹറിന്റെ കഴുത്തിലാണ് ജാവ്ലിൻ തുളച്ചുകയറിയത്.
അഗൽപൂർ ബോയ്സ് ഹൈസ്കൂളിൽ പരിശീലനത്തിനിടെ മറ്റൊരു വിദ്യാർത്ഥി എറിഞ്ഞ ജാവ്ലിൻ മെഹറിന്റെ കഴുത്തിൽ തറയ്ക്കുകയായിരുന്നു. ഇത് മറുഭാഗത്ത് കൂടി പുറത്തേക്ക് വരികയും ചെയ്തു. തുടർന്ന് വിദ്യാർത്ഥിയെ ഉടൻ ആശുപത്രിയിൽ എത്തിച്ചു. തക്കസമയത്ത് എത്തിച്ചത് മൂലം അപകടം കൂടാതെ ജാവ്ലിൻ കഴുത്തിൽ നിന്ന് പുറത്തെടുക്കാൻ സാധിച്ചുവെന്ന് ഡോക്ടർമാർ പറഞ്ഞു. കുട്ടി അപകടനില തരണം ചെയ്തു.
വിദ്യാർത്ഥിയുടെ കുടുംബത്തിന് അടിയന്തിരമായി 30,000 രൂപയുടെ ധനസഹായം നൽകാൻ ജില്ലാ കളക്ടർ ഉത്തരവിട്ടു. കുട്ടിക്ക് മെച്ചപ്പെട്ട ചികിത്സ നൽകാനും അതിനാവശ്യമായ തുക മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് ഉപയോഗിക്കാനും മുഖ്യമന്ത്രി നവീൻ പട്നായിക്കും നിർദ്ദേശിച്ചിട്ടുണ്ട്.
