ആരാധകരും സിനിമാ പ്രേമികളും ഏറെ ആവേശത്തോടെ കാത്തിരിക്കുന്ന ചിത്രമാണ് അജിത്ത് നായകനാകുന്ന തുനിവ്. എച്ച്. വിനോദ് സംവിധാനം ചെയ്യുന്ന ചിത്രത്തിന്റെ അപ്ഡേറ്റുകൾക്കായി ആരാധകർ ആകാംക്ഷയോടെയാണ് കാത്തിരിക്കുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്ററും തല അജിത്തിന്റെ സ്റ്റൈലിഷ് സ്റ്റില്ലുകളും ‘ചില്ല ചില്ല’ ഗാനവും സമൂഹമാദ്ധ്യമങ്ങളിൽ തരംഗമായിരുന്നു. ഇപ്പോഴിതാ, സിനിമയിലെ മറ്റൊരു ഗാനം കൂടി പുറത്തു വിട്ടിരിക്കുകയാണ് അണിയറപ്രവർത്തകർ. തുനി എന്ന ഗാനത്തിന്റെ ലിറിക്കൽ വീഡിയോയാണ് പുറത്തു വന്നിരിക്കുന്നത്.
അജിത്തിനൊപ്പം മലയാളത്തിന്റെ ലേഡി സൂപ്പർ സ്റ്റാർ മഞ്ജു വാര്യരും ഗാനത്തിൽ ചുവട് വയ്ക്കുന്നു. വൈശാഖാണ് ‘കസേതൻ കടവുളട’ എന്ന ഗാനത്തിന്റെ വരികൾ എഴുതിയിരിക്കുന്നത്. ജിബ്രാൻ സംഗീതം നൽകിയിരിക്കുന്ന ഗാനം ആലപിച്ചിരിക്കുന്നത് വൈശാഖും മഞ്ജു വാര്യരും ജിബ്രാനും ചേർന്നാണ്. ‘ചില്ല ചില്ല’ പോലെ ‘കസേതൻ കടവുളട’ എന്ന ഗാനവും തരംഗമാകും എന്ന് ഉറപ്പ്. ആരാധകരെ ത്രസിപ്പിക്കുന്ന ഈണത്തിലാണ് ‘കസേതൻ കടവുളട’ ഗാനം ഒരുക്കിയിരിക്കുന്നത്.
നെഗറ്റീവ് ഷേഡുള്ള വേഷമാണ് തുനിവിൽ അജിത്ത് ചെയ്യുന്നതെന്നാണ് റിപ്പോർട്ടുകൾ. നേർക്കൊണ്ട പാർവൈ, വലിമൈ എന്നിവക്ക് ശേഷം അജിത്- എച്ച് വിനോദ് ടീം ഒന്നിക്കുന്ന ചിത്രമാണ് തുനിവ്. ആക്ഷന് ത്രില്ലര് ഗണത്തില് പെടുന്ന ചിത്രത്തിന്റെ ടൈറ്റിൽ തന്നെ നൽകിയിരിക്കുന്നത് ‘നോ ഗട്ട്സ് നോ ഗ്ലോറി’ എന്നാണ്. മഞ്ജു വാര്യരാണ് ചിത്രത്തിൽ നായിക. വീര, സമുദ്രക്കനി, ജോണ് കൊക്കെൻ, തെലുങ്ക് നടൻ അജയ് എന്നിവരും ചിത്രത്തില് പ്രധാന വേഷങ്ങളില് എത്തുന്നുണ്ട്. നീരവ് ഷാ ഛായാഗ്രഹണവും വിജയ് വേലുക്കുട്ടി എഡിറ്റിംഗും നിര്വ്വഹിക്കുന്നു. ബേ വ്യൂ പ്രോജക്ട്സിന്റെ ബാനറിൽ ബോളിവുഡ് നിർമ്മാതാവായ ബോണി കപൂറാണ് ചിത്രം നിർമ്മിച്ചിരിക്കുന്നത്.
