കൂടുൽ റേഞ്ചും ബാറ്ററി പാക്കേജുമായി ഇലക്ട്രിക് വാഹനങ്ങളുടെ ലോകത്തേക്ക് ടാറ്റയുടെ നെക്സോൺ ഇവി മാക്സ് എത്തിയിരിക്കുകയാണ്. നെക്സോൺ ഇവി മാക്സ് ഇസഡ് എക്സ് പ്ലസ്, നെക്സോൺ ഇവി മാക്സ് ഇസഡ് എക്സ് പ്ലസ് ലക്സ് എന്നീ രണ്ടു മോഡലുകളിലുകളിലായി ലഭിക്കുന്ന വാഹനത്തിന്റെ വില 17.74 ലക്ഷം മുതലാണ് ആരംഭിക്കുന്നത്. റേഞ്ച് തന്നെയാണ് ഈ വാഹനത്തിന്റെ ഏറ്റവും വലിയ സവിശേഷത. ഒരു വട്ടം ചാർജ് ചെയ്താൽ 437 കിലോമീറ്റർ ദൂരം വരെ സഞ്ചരിക്കാനാകുമെന്ന് കമ്പനി അവകാശപ്പെടുന്നു.
മറ്റ് ഇലക്ട്രിക് വാഹനങ്ങളെ അപേക്ഷിച്ച് 10 കിലോവാട്ട് അധികം ബാറ്ററി കപ്പാസിറ്റി ഇവി മാക്സിനുണ്ട്. 40.5 കിലോവാട്ടാണ് പുതിയ ബാറ്ററി കപ്പാസിറ്റി. ബാറ്ററിയുടെ വലുപ്പം കൂട്ടിയിട്ടുണ്ടെങ്കിലും ബൂട്ട് സ്പേസ് ഒട്ടും തന്നെ കുറച്ചിട്ടില്ല. 350 ലിറ്റർ ബൂട്ട് സ്പേസ് തന്നെ ഇവി മാക്സിനുമുണ്ട്. 143 ബിഎച്ച്പിയും 250 എൻഎമ്മുമാണ് പുതിയ മാക്സിന്റെ കരുത്ത്.
റീജനറേറ്റീവ് ബ്രേക്കിംഗ് സിസ്റ്റം ഇതിന്റെ മറ്റൊരു സവിശേഷതയാണ്. ഓട്ടോ ബ്രേക് ലാംപ്, ഹിൽഹോൾഡ് അസിസ്റ്റ്, ഹിൽ ഡിസന്റ് അസിസ്റ്റ്, വയർലെസ് ചാർജർ, എയർ പ്യൂരിഫയർ തുടങ്ങി 30 ൽ അധികം പുതിയ ഫീച്ചറുകളുമായാണ് നെക്സോൺ ഇവി മാക്സ് വിപണിയിലെത്തിയിരിക്കുന്നത്.
