ആരാധകർ ആവേശത്തോടെ കാത്തിരിക്കുന്ന ഉണ്ണി മുകുന്ദൻ ചിത്രം മാളികപ്പുറത്തിന്റെ വിശേഷങ്ങളുമായി ചിത്രത്തിൽ കുഞ്ഞ് മാളികപ്പുറമായി വേഷമിട്ട ബാലതാരം ദേവനന്ദയും തിരക്കഥാകൃത്ത് അഭിലാഷ് പിള്ളയും. ഇരുവരും ചിത്രത്തിന്റെ വിശേഷങ്ങൾ പരസ്പരം സംസാരിക്കുന്ന വീഡിയോ ഫേസ്ബുക്കിൽ വൈറലാകുകയാണ്. അഭിലാഷ് പിള്ളയാണ് ഫേസ്ബുക്കിൽ വീഡിയോ പങ്കുവെച്ചിരിക്കുന്നത്.
ഗംഭീരമായ ഫൈറ്റും ഡാൻസുമായി മാളികപ്പുറം ഈ മാസം തിയേറ്ററിൽ എത്തുന്നതിന്റെ ആവേശത്തിലാണ് ഇരുവരും. ഉണ്ണി മുകുന്ദന്റെ തകർപ്പൻ ആക്ഷൻ രംഗങ്ങളാണ് ചിത്രത്തിന്റെ ഹൈലൈറ്റ് എന്ന് ഇരുവരും പറയുന്നു. ചിത്രത്തിലെ താരങ്ങളെയും അണിയറ പ്രവർത്തകരെയും പരിചയപ്പെടുത്തുന്ന വീഡിയോ ആരാധകർ ഏറ്റെടുക്കുകയാണ്.
തന്റെ സൂപ്പർ ഹീറോ ആയ അയ്യപ്പനെ കാണാൻ യാത്ര തിരിക്കുന്ന ഒരു എട്ട് വയസ്സുകാരിയുടെ കഥയാണ് മാളികപ്പുറം പറയുന്നത്. അടുത്തയിടെ പുറത്തിറങ്ങിയ ചിത്രത്തിന്റെ ട്രെയിലറിനും മമ്മൂട്ടി അവതരിപ്പിച്ച പുരാവൃത്ത വീഡിയോക്കും വീഡിയോ സോംഗിനും വലിയ സ്വീകാര്യതയാണ് സാമൂഹിക മാദ്ധ്യമങ്ങളിൽ ലഭിക്കുന്നത്. അയ്യപ്പഭക്തർക്കുള്ള തന്റെ സമർപ്പണമാണ് ഈ ചിത്രമെന്ന് ഉണ്ണി മുകുന്ദൻ പ്രഖ്യാപിച്ചിരുന്നു.
നാരായം, കുഞ്ഞിക്കൂനൻ, മിസ്റ്റർ ബട്ലർ, മന്ത്രമോതിരം തുടങ്ങിയ ചിത്രങ്ങൾ സംവിധാനം ചെയ്ത ശശി ശങ്കറിന്റെ മകൻ വിഷ്ണു ശശി ശങ്കറാണ് മാളികപ്പുറത്തിന്റെ സംവിധായകൻ. ഷമീർ മുഹമ്മദ് എഡിറ്റിംഗ് നിർവഹിച്ചിരിക്കുന്ന ചിത്രത്തിന്റെ ഛായാഗ്രഹണം വിഷ്ണു നാരായണൻ നമ്പൂതിരിയാണ്.
പത്താം വളവ്, നൈറ്റ് ഡ്രൈവ്, കഡാവർ എന്നിവയ്‌ക്ക് ശേഷം അഭിലാഷ് പിള്ള രചന നിർവഹിക്കുന്ന ചിത്രമാണ് മാളികപ്പുറം. ഉണ്ണി മുകുന്ദനൊപ്പം ദേവനന്ദ, ശ്രീപദ്, മനോജ് കെ ജയൻ, രമേഷ് പിഷാരടി, ശ്രീജിത്ത് രവി, വിജയകൃഷ്ണൻ, കലാഭവൻ ജിന്റോ, അജയ് വാസുദേവ്, അരുൺ മാമ്മൻ, സന്ദീപ് രാജ്, ആൽഫി പഞ്ഞിക്കാരൻ, മനോഹരി ജോയ്, തുഷാര പിള്ള, മഞ്ജുഷ സതീഷ്, അശ്വതി അഭിലാഷ്, നമിത രമേശ് തുടങ്ങി വൻ താരനിരയാണ് ചിത്രത്തിലുള്ളത്.
ആന്റോ ജോസഫിന്റെ ഉടമസ്ഥതയിലുള്ള ആൻ മെഗാ മീഡിയ, വേണു കുന്നപ്പിള്ളിയുടെ ഉടമസ്ഥതയിലുള്ള കാവ്യ ഫിലിം കമ്പനി എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. സംഗീതവും പശ്ചാത്തല സംഗീതവും രഞ്ജിൻ രാജ് നിർവഹിച്ചിരിക്കുന്നു. സന്തോഷ് വർമ്മ, ബി കെ ഹരിനാരായണൻ എന്നിവരാണ് ഗാനങ്ങൾ രചിച്ചിരിക്കുന്നത്. കലാസംവിധാനം സുരേഷ് കൊല്ലം.
