സിനിമാ പ്രേമികളെ കോരിത്തരിപ്പിച്ചുകൊണ്ട് മാളികപ്പുറം ചിത്രത്തിന്റെ ട്രെയിലർ കഴിഞ്ഞ ദിവസമാണ് പുറത്തുവന്നത്. അവിടന്നങ്ങോട്ട് ചിത്രത്തിന്റെ റിലീസ് ദിനം അറിയാനുള്ള ആകാംക്ഷയിലാണ് ആരാധകർ. ഇപ്പോഴിതാ ചിത്രത്തിന്റെ പുതിയ പോസ്റ്റർ പുറത്തുവിട്ടിരിക്കുകയാണ് പ്രധാന കഥാപാത്രത്തെ അവതരിപ്പിക്കുന്ന ഉണ്ണി മുകുന്ദൻ. ഇനിയും കാത്തിരിക്കാൻ വയ്യെന്ന അടിക്കുറിപ്പോടെയാണ് നടൻ പോസ്റ്റർ പങ്കുവച്ചിരിക്കുന്നത്.
ദയവായി ആ റിലീസ് തീയതി ഒന്ന് പ്രഖ്യാപിക്കൂവെന്ന കമന്റുകളാണ് പോസ്റ്റിന് താഴെ ഉയരുന്നത്. ഇതിന് റിപ്ലൈ കമന്റും ഉണ്ണി മുകുന്ദൻ നൽകി. ‘ യൂ മീൻ തേങ്ങ ഉടയ്ക്ക് സ്വാമീ..? ” എന്നായിരുന്നു നടന്റെ മറുപടി. ഇതിനെ ചുവടുപിടിച്ച് നിരവധി ആരാധകർ ഡയലോഗ് ആവർത്തിച്ചു. തേങ്ങയൊന്ന് ഉടയ്ക്കൂ, അങ്ങോട്ട് ഉടയ്ക്ക് സ്വാമീ.., നടയെന്ന് തുറക്കും എന്നീ കമന്റുകളും പോസ്റ്ററിന് താഴെയുണ്ട്. ഇനിയുമേറെ കാത്തിരിക്കാൻ വയ്യെന്ന പ്രതികരണങ്ങളും ആരാധകർ രേഖപ്പെടുത്തി.
റിലീസ് ചെയ്യാനിരിക്കുന്ന അടുത്ത ഉണ്ണി മുകുന്ദൻ ചിത്രത്തിന്റെ വിശേഷങ്ങളും നടൻ ഫേസ്ബുക്കിലൂടെ പങ്കുവച്ചു. ദേശീയ പുരസ്കാര ജേതാവ് അപർണ ബാലമുരളിയുൾപ്പെടെ പ്രധാന വേഷത്തിലെത്തുന്ന മിണ്ടിയും പറഞ്ഞും ആണ് ഉണ്ണിയുടെ അടുത്ത ചിത്രം. സിനിമയ്ക്ക് ക്ലീൻ യു സർട്ടിഫിക്കറ്റ് കിട്ടയ വിവരമാണ് നടൻ ഫേസ്ബുക്ക് പോസ്റ്റിലൂടെ അറിയിച്ചത്. അടുത്തുതന്നെ സിനിമയുടെ റിലീസ് ഉണ്ടാകുമെന്ന സൂചനം നടൻ പോസ്റ്റിലൂടെ നൽകി.
