ന്യൂഡൽഹി: ചൈനയിലും അമേരിക്കയിലും മറ്റ് ലോകരാജ്യങ്ങളിലും കൊറോണ വ്യാപനം വർദ്ധിക്കുന്ന സാഹചര്യത്തിൽ മുൻകരുതൽ നീക്കവുമായി കേന്ദ്ര സർക്കാർ. രാജ്യത്ത് കൊവിഡ് മാനദണ്ഡങ്ങൾ പാലിക്കാൻ കേന്ദ്ര ആരോഗ്യ വകുപ്പ് മന്ത്രി മൻസുഖ് മാണ്ഡവ്യ ജനങ്ങളോട് അഭ്യർത്ഥിച്ചു. കോൺഗ്രസ് നേതാവ് രാഹുൽ ഗാന്ധി നയിക്കുന്ന ഭാരത് ജോഡോ യാത്രയിൽ കൊവിഡ് മാനദണ്ഡങ്ങൾ പാലിക്കണമെന്ന് കാണിച്ച് കേന്ദ്ര സർക്കാർ കത്തയച്ചു.
ഇതിനോട് വളരെ മോശമായ രീതിയിലായിരുന്നു കോൺഗ്രസ് നേതാക്കളുടെ പ്രതികരണം. അടുത്തയിടെ പ്രധാനമന്ത്രി നരേന്ദ്ര മോദി ഗുജറാത്തിൽ തിരഞ്ഞെടുപ്പ് പ്രചാരണം നയിച്ചപ്പോൾ നിയന്ത്രണങ്ങൾ ഉണ്ടായിരുന്നില്ലല്ലോ എന്നാണ് കോൺഗ്രസ് നേതാക്കൾ ചോദിക്കുന്നത്. യാത്രയെ പേടിച്ചാണ് ബിജെപി അതിന് നിയന്ത്രണങ്ങൾ ഏർപ്പെടുത്താൻ ശ്രമിക്കുന്നതെന്നും കോൺഗ്രസ് നേതാക്കൾ ആരോപിക്കുന്നു.
കോൺഗ്രസിന്റെ ആരോപണം ശുദ്ധ അസംബന്ധമാണ് എന്നാണ് ബിജെപി നേതാക്കൾ മറുപടി നൽകുന്നത്. തിരഞ്ഞെടുപ്പ് നടന്നപ്പോൾ ഉള്ള കൊറോണ സാഹചര്യമല്ല ഇപ്പോഴുള്ളത്. കഴിഞ്ഞ ദിവസങ്ങളിലാണ് ചൈനയിൽ ഉൾപ്പെടെ കൊറോണ വ്യാപനം രൂക്ഷമായത്. വ്യാപന ശേഷിയും തീവ്രതയും കൂടിയ രോഗബാധയാണ് റിപ്പോർട്ട് ചെയ്യപ്പെടുന്നത്. അൽപ്പമെങ്കിലും സാമാന്യ ബോധവും വിവേകവുമുണ്ടെങ്കിൽ കോൺഗ്രസ് നേതാക്കൾ ഇങ്ങനെ നിരുത്തരവാദപരമായി പെരുമാറില്ലെന്നും ബിജെപി നേതാക്കൾ ചൂണ്ടിക്കാട്ടുന്നു.
അതേസമയം, കോൺഗ്രസ് നേതാക്കളുടെ നിരുത്തരവാദപരമായ പ്രതികരണങ്ങൾക്കെതിരെ രൂക്ഷവിമർശനവുമായി കേന്ദ്ര ആരോഗ്യ വകുപ്പ് മന്ത്രി മൻസുഖ് മാണ്ഡവ്യ രംഗത്തെത്തി. ഒരു കുടുംബത്തിന് വേണ്ടി നിയമങ്ങൾ മാറ്റുന്ന കാലം കഴിഞ്ഞു. രാജ്യത്തെ കൊറോണ വ്യാപനത്തിൽ നിന്നും രക്ഷിക്കുക എന്നത് കേന്ദ്ര ആരോഗ്യ വകുപ്പ് മന്ത്രി എന്ന നിലയിൽ തന്റെ ചുമതലയാണെന്ന് അദ്ദേഹം പറഞ്ഞു.
ഭാരത് ജോഡോ യാത്രയിൽ പങ്കെടുത്ത നിരവധി പേർക്ക് കൊറോണ വൈറസ് ബാധയുണ്ടായതായി കേന്ദ്ര മന്ത്രി ചൂണ്ടിക്കാട്ടി. കൊറോണ വ്യാപനം വീണ്ടും ഭീഷണി ഉയർത്തുന്ന സാഹചര്യത്തിൽ കൊവിഡ് പ്രോട്ടോക്കോൾ പാലിക്കണമെന്ന് രാഹുൽ ഗാന്ധിക്ക് അയച്ച കത്തിൽ മൻസുഖ് മാണ്ഡവ്യ ആവശ്യപ്പെട്ടിരുന്നു. യാത്രയിൽ മാസ്കും സാനിറ്റൈസറും നിർബന്ധമാക്കണം. വാക്സിൻ സ്വീകരിച്ചവരെ മാത്രമേ യാത്രയിൽ പങ്കെടുക്കാൻ അനുവദിക്കാവൂ എന്നും മൻസുഖ് മാണ്ഡവ്യ അറിയിച്ചിരുന്നു. കൊവിഡ് മാനദണ്ഡങ്ങൾ പാലിക്കാൻ കഴിയില്ലെങ്കിൽ പൊതുജന താത്പര്യം മുൻനിർത്തി ഭാരത് ജോഡോ യാത്ര നിർത്തി വെക്കണമെന്നും കേന്ദ്ര മന്ത്രി അഭ്യർത്ഥിച്ചിരുന്നു.
