ഉണ്ണിമുകുന്ദൻ നായകനാകുന്ന മാളികപ്പുറം എന്ന ചിത്രത്തിലെ രണ്ടാമത്തെ ഗാനം പുറത്ത്. ഗാനഗന്ധവ്വൻ യേശുദാസിന്റെ സ്വര മാധുരിയില് പതിനെട്ടു മലകള്ക്കും മുകളില് ശബരിമലയില് വാഴും ശ്രീ അയ്യപ്പനെ ഉറക്കുന്ന താരാട്ട് പാട്ടാണ് ഹരിവരാസനം. ഹരിവരാസനത്തിന്റെ പുനരാവിഷ്കാരമാണ് മാളികപ്പുറത്തിന്റെ അണിയറ പ്രവർത്തകർ രണ്ടാമത്തെ ഗാനമായി പുറത്തു വിട്ടിരിക്കുന്നത്. ‘ഹരിവരാസനം’ പിറന്ന് നൂറ് വർഷമാകുമ്പോഴാണ് ഗാനത്തിന്റെ പുനരാവിഷ്കാരം മാളികപ്പുറം ടീം അയ്യപ്പ ഭക്തർക്ക് സമർപ്പിച്ചിരിക്കുന്നത് എന്നതും ശ്രദ്ധേയമാണ്. സംഗീത സംവിധായകൻ രഞ്ജിൻ രാജാണ് ഹരിവരാസനം പുനഃക്രമീകരിച്ചിരിക്കുന്നത്.
മാളികപ്പുറത്തിന് വേണ്ടി ‘ഹരിവരാസനം’ പാടിയിരിക്കുന്നത് ഗായകൻ പ്രകാശ് പുത്തൂർ ആണ്. ചിത്രത്തിനു വേണ്ടി ഗാനം ആലപിക്കാൻ ഗായകനെ തിരഞ്ഞെടുക്കുന്നതിന് മാളികപ്പുറത്തിന്റെ അണിയറ പ്രവർത്തകർ സംഗീത മത്സരം സംഘടിപ്പിച്ചിരുന്നു. ആയിരത്തിലേറെ ഗായകർ പങ്കെടുത്ത മത്സരത്തിൽ നിന്നാണ് പ്രകാശ് പുത്തൂർ തിരഞ്ഞെടുക്കപ്പെട്ടത്. പുത്തൂർ സ്വദേശിയായ പ്രകാശ്, ഗാനമേള വേദികളിൽ സജീവ സാന്നിധ്യമാണ്. പത്തനംതിട്ടയിലെ സാരംഗ് എന്ന ഗാനമേള ട്രൂപ്പിലെ ഗായകനാണ് ഇദ്ദേഹം. ഗായകൻ കെ.ജെ.യേശുദാസിന്റെ ശബ്ദത്തോടു സാമ്യമുള്ള പ്രകാശിന്റെ ആലാപനം മുമ്പും ശ്രദ്ധ നേടിയിട്ടുണ്ട്.
മലയാളം,തമിഴ്, തെലുങ്ക്, കന്നഡ എന്നീ ഭാഷകളിലാണ് മാളികപ്പുറം റിലീസ് ചെയ്യുക. വിഷ്ണു ശശി ശങ്കറാണ് ചിത്രത്തിന്റെ സംവിധാനം. അഭിലാഷ് പിള്ളയാണ് തിരക്കഥ ഒരുക്കിയിരിക്കുന്നത്. മനോജ് കെ ജയൻ, സൈജു കുറുപ്പ്, രമേശ് പിഷാരടി, സമ്പത്ത് റാം, ആൽഫി പഞ്ഞിക്കാരൻ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നു. ഛായാഗ്രഹണം-വിഷ്ണുനാരായണൻ, സംഗീതം,പശ്ചാത്തല സംഗീതം- രഞ്ജിൻ രാജ്. ആന്റോ ജോസഫും വേണു കുന്നപ്പിള്ളിയും ചേർന്നാണ് ചിത്രം നിർമ്മിച്ചിരിക്കുന്നത്.
