ഉണ്ണിമുകുന്ദൻ നായകനാകുന്ന മാളികപ്പുറം എന്ന ചിത്രത്തിലെ മൂന്നാമത്തെ ഗാനം പുറത്ത്. ‘നങ്ങേലിപ്പൂവേ’ എന്നു തുടങ്ങുന്ന മനോഹരമായ മെല‍ഡിയാണ് അണിയറ പ്രവർത്തകർ പുറത്തു വിട്ടിരിക്കുന്നത്. ദേവനന്ദ എന്ന കുട്ടി അവതരിപ്പിക്കുന്ന കഥാപാത്രവും സൈജു കുറുപ്പിന്റെ കഥാപാത്രവും ശബരിമലയ്‌ക്ക് പോകുവാൻ വൃതമെടുത്ത് മാലയിടുന്നതാണ് ഗാനത്തിലെ രംഗം. ബി.കെ.ഹരിനാരായണന്റെ വരികൾക്ക് രഞ്ജിൻ രാജ് സംഗീതം നൽകിയിരിക്കുന്നു. രഞ്ജിൻ തന്നെയാണ് ഗാനം ആലപിച്ചിരിക്കുന്നതും. നേരത്തെ ചിത്രത്തിലെ ’ഗണപതി തുണയരുളുക’, ‘ഹരിവരാസനം’ എന്നീ ഗാനങ്ങളും പുറത്തു വിട്ടിരുന്നു.
മലയാളം,തമിഴ്, തെലുങ്ക്, കന്നഡ എന്നീ ഭാഷകളിലാണ് മാളികപ്പുറം റിലീസ് ചെയ്യുക. ക്ലീൻ യു സർട്ടിഫിക്കറ്റാണ് ചിത്രത്തിന് ലഭിച്ചിരിക്കുന്നത്. എട്ടു വയസ്സുകാരി കല്യാണിയുടെയും അവളുടെ സൂപ്പർഹീറോ ആയ അയ്യപ്പന്റെയും കഥയാണ് ‘മാളികപ്പുറം’. ഉണ്ണിമുകുന്ദനൊപ്പം ശ്രീപഥ്, ദേവനന്ദ എന്നീ ബാലതാരങ്ങളും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. വിഷ്ണു ശശി ശങ്കറാണ് ചിത്രത്തിന്റെ സംവിധാനം. അഭിലാഷ് പിള്ളയാണ് തിരക്കഥ ഒരുക്കിയിരിക്കുന്നത്.
മനോജ് കെ ജയൻ, സൈജു കുറുപ്പ്, രമേശ് പിഷാരടി, സമ്പത്ത് റാം, ആൽഫി പഞ്ഞിക്കാരൻ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നു. ഛായാഗ്രഹണം-വിഷ്ണുനാരായണൻ, സംഗീതം,പശ്ചാത്തല സംഗീതം- രഞ്ജിൻ രാജ്. ആന്റോ ജോസഫും വേണു കുന്നപ്പിള്ളിയും ചേർന്നാണ് ചിത്രം നിർമ്മിച്ചിരിക്കുന്നത്.
