ബോളിവുഡ് ചിത്രങ്ങൾ നിരന്തരമായി പരാജയപ്പെടുന്നതോടെ വലിയ ട്രോളുകളും പരിഹാസങ്ങളുമാണ് ഉയരുന്നത്. പലപ്പോഴും ഇത് അതിരു വിടാറുമുണ്ട്. ഇത്തരം പരിഹാസങ്ങളിലൂടെ വിദ്വേഷം പടർത്താനും ചിലർ ശ്രമിക്കുന്നുണ്ട്. ഇപ്പോഴിതാ, തെന്നിന്ത്യൻ സിനിമകൾ ബോളിവുഡ് ചിത്രങ്ങളെക്കാൾ മികച്ച വിജയം നേടുന്നു എന്നതുകൊണ്ട് ബോളിവുഡിനെ കളിയാക്കരുത് എന്ന് തുറന്നു പറഞ്ഞിരിക്കുകയാണ് നടൻ യാഷ്. ബോളിവുഡിന് ഇതൊരു പ്രതിസന്ധി ഘട്ടം മാത്രമാണെന്നും അദ്ദേഹം ചൂണ്ടിക്കാണിച്ചു.
‘ഈ വര്‍ഷം തെന്നിന്ത്യന്‍ ചിത്രങ്ങള്‍ക്ക് വലിയ നേട്ടമുണ്ടാക്കാന്‍ കഴിഞ്ഞു. ഉത്തരേന്ത്യന്‍ സിനിമയും ദക്ഷിണേന്ത്യന്‍ സിനിമയും തമ്മിലുള്ള തര്‍ക്കം അവസാനിപ്പിക്കണം. ആരെയും പരിഹസിക്കുന്നതും വിഷമിപ്പിക്കുന്നതും നല്ലതല്ല. കന്നട പ്രേക്ഷകര്‍ അന്യഭാഷ ചിത്രങ്ങളെ താഴ്‌ത്തിക്കെട്ടുന്നതിനോട് എനിക്ക് താൽപ്പര്യമില്ല. നമ്മളും ഇതേ അവസ്ഥ കടന്നു വന്നവരാണ്. കന്നട ചിത്രങ്ങളും ധാരാളം പരിഹാസമേറ്റ് വാങ്ങിയിട്ടുണ്ട്’.
‘കന്നട സിനിമ പ്രതിസന്ധികളെ മറി കടന്നത് കഠിനാധ്വാനത്തിലൂടെയാണ്. അതുകൊണ്ടു തന്നെ മറ്റ് മേഖലകളെ താഴ്‌ത്തിക്കെട്ടരുത്. വടക്ക്, തെക്ക് എന്നിങ്ങനെയുള്ള വ്യത്യാസങ്ങളെ മറന്ന് ബോളിവുഡ് ഉള്‍പ്പെടെയുള്ള എല്ലാ സിനിമാ മേഖലകളേയും ബഹുമാനിക്കണം. ബോളിവുഡ് സിനിമകളും നമ്മളെ ഒരുപാട് കാര്യങ്ങള്‍ പഠിപ്പിച്ചിട്ടുണ്ട്. ബോളിവുഡിനെ പുച്ഛിച്ചു മാറ്റി നിര്‍ത്താനുള്ളതല്ല. ഇത് ഒരു പ്രതിസന്ധി ഘട്ടം മാത്രമാണ്’ എന്ന് ഫിലിം കമ്പാനിയനു നല്‍കിയ അഭിമുഖത്തിലാണ് യാഷ് പറഞ്ഞത്.
