കൊച്ചി: സനാതന ധർമ്മത്തിന്റെ പ്രചാരണാർത്ഥം അമേരിക്കയിൽ പ്രവർത്തിക്കുന്ന കേരള ഹിന്ദൂസ് ഓഫ് നോർത്ത് അമേരിക്കയുടെ ആർഷദർശ പുരസ്കാരം ശ്രീകുമാരൻ തമ്പിക്ക്. വേദ സാഹിത്യത്തിന്റെ ധർമ്മ സന്ദേശം രചനകളിലൂടെ പ്രതിഫലിപ്പിക്കുന്ന മലയാളി സാഹിത്യകാരനെ ആദരിക്കുന്നതാണ് പുരസ്കാരം. ഒരു ലക്ഷം രൂപയും പ്രശസ്തിപത്രവും ശില്പവുമടങ്ങുന്ന പുരസ്കാരമാണ് നൽകുക.
സി. രാധാകൃഷ്ണൻ, പ്രഭാവർമ്മ, സൂര്യാകൃഷ്ണമൂർത്തി, കെ ജയകുമാർ, പി ശ്രീകുമാർ എന്നിവരടങ്ങിയ സമിതിയാണ് പുരസ്കാരം നിർണ്ണയിച്ചത്. കവി, ഗാനരചയിതാവ്, തിരക്കഥാകൃത്ത്, സംവിധായകൻ, നിർമാതാവ് എന്നീ നിലകളിൽ സിനിമയുടെ എല്ലാ തലത്തിലും മായാത്ത വ്യക്തിമുദ്ര പതിപ്പിക്കുകയും മലയാള സാഹിത്യത്തെ സമ്പന്നമാക്കുകയും ആർഷഭാരത സംസ്കാരത്തിന്റെ അടിസ്ഥാന മൂല്യങ്ങൾ കൈവിടാതെ ജീവിതം നയിക്കുകയും ചെയ്ത പ്രതിഭാശാലിയാണ് ശ്രീകുമാരൻ തമ്പിയെന്ന് സമിതി വിലയിരുത്തി. സമിതി ചെയർമാൻ സി. രാധാകൃഷ്ണനാണ് ഇക്കാര്യം അറിയിച്ചത്.
വ്യത്യസ്ത നിലകളിൽ അദ്ദേഹം നൽകിയിട്ടുള്ള സംഭാവനകൾ നമ്മുടെ സാംസ്കാരിക ജീവിതത്തിന്റെ വിലപ്പെട്ട ഈടുവെയ്പ്പാണ്. പതിറ്റാണ്ടുകളായി കവിതയ്ക്കും ഗാനരംഗത്തിനും നൽകിപ്പോരുന്ന സേവനം മലയാള ഭാഷയെ നവീകരിക്കുന്നതിനും ശക്തിപ്പെടുത്തുന്നതിനും വഴിവെച്ചതായും സാംസ്കാരിക സത്ത പാലിൽ പഞ്ചസാര എന്നവണ്ണം ശ്രീകുമാരൻതമ്പിയുടെ ഗാനങ്ങളിൽ നിറഞ്ഞുനിൽക്കുന്നതായും സമിതി പറഞ്ഞു. അക്കിത്തം, സി രാധാകൃഷ്ണൻ എന്നിവർക്കായിരുന്നു മുൻ വർഷങ്ങളിൽ പുരസ്കാരം നൽകിയത്.
ജനുവരി 28ന് തിരുവനന്തപുരത്ത് നടക്കുന്ന ചടങ്ങിൽ പുരസ്കാരം സമ്മാനിക്കുമെന്ന് കേരള ഹിന്ദൂസ് ഓഫ് നോർത്ത് അമേരിക്ക ട്രസ്റ്റി ബോർഡ് ചെയർമാൻ രാംദാസ്പിള്ള പറഞ്ഞു.
Comments