ചരിത്രത്തിൽ ഇടം പിടിച്ച പ്രധാന സംഭവങ്ങളുടെ തീയതി മുതൽ വേണ്ടപ്പെട്ടവരുടെ പിറന്നാളുകൾ, വിവാഹ വാർഷികങ്ങൾ വരെ ഒന്നും ഓർമ്മയിൽ നിൽക്കുന്നില്ലെന്ന് പലരും പരാതി പറയാറുണ്ട്. അടുപ്പിൽ പാൽ തിളപ്പിക്കാൻ വച്ചത് മറന്ന് വേറെ എവിടെയെങ്കിലും ചെന്ന് നിൽക്കുക, പ്രധാനപ്പെട്ട ഒരു സ്ഥലത്തേക്ക് പോകുമ്പോൾ കൈവശം വയ്ക്കേണ്ട രേഖകൾ മറക്കുക, ആളുകളുടെ പേരുകൾ ഓർമ്മിച്ചെടുക്കാൻ പറ്റാതെ വരിക, പരീക്ഷയ്ക്ക് പഠിച്ചുവച്ച പലതും മറന്നുപോവുക തുടങ്ങി മറവികൾ പല തരമാണ്. എങ്ങനെ നമുക്ക് ഓർമ്മ ശക്തി വർധിപ്പിക്കാം. അതിനുള്ള ചില മാർഗങ്ങൾ ഇതാ..
ഓർമ്മ ശക്തി കൂട്ടാൻ മധുരം കഴിക്കുന്നത് കുറയ്ക്കാമെന്നാണ് പഠനങ്ങൾ പറയുന്നത്. ആഹാരത്തിൽ പഞ്ചസാരയുടെ അളവ് കൂടുതലായി ഉപയോഗിക്കുന്നവരെയും കുറവ് കഴിക്കുന്നവരെയും പഠനത്തിന് വിധേയമാക്കിയപ്പോഴാണ് ഈ വിവരം പുറത്തുവരുന്നത്. ദിവസവും വലിയ അളവിൽ മധുരം കഴിക്കുന്നവരേക്കാൾ ഓർമ്മ ശക്തി കുറച്ച് മധുരം കഴിക്കുന്നവർക്കുണ്ടെന്ന് പഠനങ്ങൾ പറയുന്നു.
മത്സ്യവും അനുബന്ധ ആഹാര സാധനങ്ങളും കഴിക്കുന്നത് ഓർമ്മ ശക്തി വർധിപ്പിക്കാൻ സഹായിക്കും. മത്സ്യത്തിൽ അടങ്ങിയിരിക്കുന്ന ഒമേഗ-3 ഫാറ്റി ആസിഡുകളാണ് ഇതിന് സഹായിക്കുന്നത്.
ധ്യാനം ചെയ്യുന്നത് നല്ലതാണ്. ശരീരത്തിന് മാത്രമല്ല, തലച്ചോറിന്റെ വികാസത്തിനും മെഡിറ്റേഷൻ ഗുണം ചെയ്യും. ഇത് ഓർമ്മ ശക്തി കൂട്ടാനും സഹായിക്കും.
ഉയരത്തിനും പ്രായത്തിനുമനുസരിച്ചുള്ള ശരീര ഭാരം നിലനിർത്തുന്നതും ഓർമ്മ ശക്തിയുണ്ടാകാൻ സഹായിക്കുമെന്നാണ് പഠനങ്ങൾ പറയുന്നത്. ആവശ്യത്തിന് ഉറക്കം ലഭിച്ചില്ലെങ്കിലും മറവി പ്രശ്നങ്ങളുണ്ടാകാം. അതിനാൽ ശരീരത്തിന് ആവശ്യമായ ഉറക്കം ദിവസവും നൽകാൻ ശ്രദ്ധിക്കുക.
ഓർമ്മ ശക്തിയെ വികസിപ്പിക്കാൻ സഹായിക്കുന്ന തരത്തിലുള്ള മൊബൈൽ ഗെയിമുകൾ ശീലമാക്കുന്നതും നല്ലതാണ്. ശരീരത്തിൽ വിറ്റമിൻ ഡിയുടെ കുറവുണ്ടാകുന്നതും ഓർമ്മശക്തിയെ ബാധിച്ചേക്കാം. അതിനാൽ ടെസ്റ്റ് ചെയ്ത് വിറ്റമിൻ ഡിയുടെ കുറവുണ്ടോയെന്ന് പരിശോധിക്കാവുന്നതാണ്.
