തെന്നിന്ത്യ കണ്ട ഏറ്റവും വലിയ വിവാഹമായിരുന്നു ലേഡി സൂപ്പർസ്റ്റാർ നയൻതാരയുടെയും വിഘ്നേശ് ശിവന്റെയും. പിന്നാലെ, തങ്ങൾ ഇരട്ടക്കുട്ടികളുടെ മാതാപിതാക്കളായെന്നും താരങ്ങൾ വെളിപ്പെടുത്തിയിരുന്നു. ഇപ്പോഴിതാ, തങ്ങളുടെ കുട്ടികൾക്കൊപ്പം ക്രിസ്തുമസ് ആഘോഷിച്ചിരിക്കുകയാണ് താരദമ്പതികൾ. മാതാപിതാക്കളായതിന് ശേഷമുള്ള ഇവരുടെ ആദ്യ ക്രിസ്തുമസാണിത്. ഒരു കുട്ടിയെ എടുത്തുകൊണ്ട് വിഘ്നേശ് സോഫയിലും, മറ്റൊരു കുട്ടിയെ മാറോട് ചേർത്ത് നയൻ നിലത്തും ഇരിക്കുന്ന ഹൃദ്യമായ ചിത്രമാണ് താരങ്ങൾ സമൂഹമാദ്ധ്യമങ്ങളിൽ പങ്കുവെച്ചിരിക്കുന്നത്. അതേസമയം, കുട്ടികളുടെ മുഖം ഇവർ വെളിപ്പെടുത്തിയിട്ടില്ല.
‘എല്ലാവർക്കും ഉയിർ, ഉലകം, നയൻ, വിക്കി കുടുംബത്തിന്റെ ക്രിസ്തുമസ്-പുതുവത്സര ആശംസകൾ. സ്വപ്നം കണ്ട ഒരു ജീവിതം നയിക്കാൻ നിങ്ങൾക്കെല്ലാവർക്കും സാധിക്കട്ടെ. എല്ലാ സന്തോഷവും അനുഗ്രഹങ്ങളും നൽകാൻ ദൈവത്തോട് പ്രാർത്ഥിക്കുന്നു’ എന്ന് കുറിച്ചു കൊണ്ടാണ് വിഘ്നേശ് ശിവൻ ചിത്രം ഇൻസ്റ്റാഗ്രാമിൽ പങ്കുവെച്ചിരിക്കുന്നത്. മഹാബലിപുരത്തെ ഷെറാട്ടൺ ഗ്രാൻഡ് റിസോർട്ടിൽ വച്ച് ജൂൺ 9-നായിരുന്നു നയൻതാരയുടെയും വിഘ്നേഷിന്റെയും വിവാഹം നടന്നത്.
വിവാഹം കഴിഞ്ഞ് നാല് മാസങ്ങൾക്ക് ശേഷമാണ് ഇരട്ട ആൺകുഞ്ഞുങ്ങൾ പിറന്ന വിവരം താരദമ്പതികൾ പങ്കുവെച്ചത്. സംഭവം വലിയ ചർച്ചയായതോടെ വാടക ഗർഭധാരണത്തിലൂടെയാണെന്ന് ഇരുവരും വ്യക്തമാക്കുകയായിരുന്നു. ഇതോടെ തമിഴ്നാട് സർക്കാർ അന്വേഷണവും പ്രഖ്യാപിച്ചു. അന്വേഷണത്തിന് പിന്നാലെ ആറ് വർഷങ്ങൾക്ക് മുമ്പ് താനും സംവിധായകൻ വിഘ്നേശ് ശിവനുമായുള്ള വിവാഹം കഴിഞ്ഞതായി നയൻതാര വെളിപ്പെടുത്തി.
Comments