കോഴിക്കോട് : സന്തോഷ് ട്രോഫി ആദ്യ മത്സരത്തിൽ രാജസ്ഥാന്റെ ഗോൾവല നിറച്ച് കേരളം. രണ്ടാം പകുതി ആരംഭിച്ചപ്പോൾ ആതിഥേയർ എതിരില്ലാത്ത ആറു ഗോളുകൾക്ക് മുന്നിലാണ്. വിഘ്നേഷ്, നരേഷ് എന്നിവർ ഇരട്ട ഗോളുകൾ നേടിയപ്പോൾ നിജോ ഗിൽബർട്ടും റിസ്വാനും ഓരോ ഗോളുകൾ വീതമടിച്ചു.
ആക്രമണ തന്ത്രവുമായി തുടക്കത്തിലേ മുന്നേറിയ കേരളം ആറാം മിനിറ്റിൽ തന്നെ ആദ്യ ഗോൾ നേടി. ഗിൽബർട്ടാണ് ഗോൾ വേട്ടയ്ക്ക് തുടക്കമിട്ടത്. 12-ാം മിനിറ്റിൽ വിഘ്നേഷും ലക്ഷ്യം കണ്ടു. 20-ാം മിനിറ്റിൽ വിഘ്നേഷ് തന്റെ രണ്ടാം ഗോളിലൂടെ കേരളത്തിന്റെ നേട്ടം 3-0 ആക്കി ഉയർത്തി. 23-ാം മിനിറ്റിൽ നരേഷ് നാലാം ഗോളും 36-ാം മിനിറ്റിൽ അഞ്ചാം ഗോളും നേടി.
ആദ്യ പകുതിയിൽ തന്നെ 5-0ന് മുന്നിലായ കേരളം രണ്ടാം പകുതിയിലും രാജസ്ഥാന് ഒരു അവസരവും നൽകാതെ ആക്രമണം തുടരുകയാണ്. 54-ാം മിനിറ്റിൽ റിസ്വാനിലൂടെ കേരളം ആറാം ഗോളും രാജസ്ഥാന്റെ വലയിലെത്തിച്ചു.
