മമ്മൂട്ടിയെ നായകനാക്കി ബി.ഉണ്ണികൃഷ്ണൻ സംവിധാനം ചെയ്യുന്ന ചിത്രമാണ് ‘ക്രിസ്റ്റഫർ’. സിനിമയിലെ മമ്മൂട്ടിയുടെ ലുക്ക് ഒഴികെ മറ്റ് അപ്ഡേറ്റുകളൊന്നും അണിയറ പ്രവർത്തകർ പുറത്തു വിട്ടിരുന്നില്ല. ഇപ്പോഴിതാ, 27-ാം തീയതി ചിത്രത്തിന്റെ ഒരു അപ്ഡേറ്റ് ഉണ്ടാകുമെന്ന് അറിയിച്ചിരിക്കുകയാണ് ക്രിസ്റ്റഫർ ടീം. വൈകീട്ട് 6 മണിക്കാണ് സർപ്രൈസ് പുറത്തു വിടുക. ചിത്രത്തിന്റെ ട്രെയിലറോ, ടീസറോ ആണ് അണിയറ പ്രവർത്തകർ റിലീസ് ചെയ്യുന്നത്.
‘മരണം ശ്വസിക്കുന്നവൻ, അവൻ നിങ്ങളുടെ അരികിലേയ്ക്ക് വരുന്നു’ എന്ന കുറിപ്പോടെയാണ് അപ്ഡേറ്റ് സൂചിപ്പിച്ചു കൊണ്ടുള്ള ചിത്രത്തിന്റെ പോസ്റ്റർ പുറത്തു വിട്ടിരിക്കുന്നത്. ‘ബയോഗ്രഫി ഓഫ് എ വിജിലന്റ് കോപ്പ്’ എന്ന ടാഗ് ലൈനോടെ എത്തുന്ന ചിത്രം ത്രില്ലർ ഗണത്തിൽ പെടുന്ന ഒന്നായിരിക്കും. ഉദയകൃഷ്‍ണയുടേതാണ് തിരക്കഥ. അമല പോൾ, ഐശ്വര്യ ലക്ഷ്മി, സ്നേഹ എന്നിങ്ങനെ മൂന്ന് നായികമാരാണ് ചിത്രത്തിലുള്ളത്. തെന്നിന്ത്യൻ താരം വിനയ് റായും ഒരു പ്രധാന വേഷത്തിൽ എത്തുന്നു.
ആർ.ഡി ഇല്യൂമിനേഷൻസ് ആണ് ‘ക്രിസ്റ്റഫർ’ നിർമ്മിക്കുന്നത്. ഷൈൻ ടോം ചാക്കോ, ദിലീഷ് പോത്തൻ, സിദ്ദിഖ്, ജിനു എബ്രഹാം, വിനീത കോശി, വാസന്തി തുടങ്ങിയ വലിയ താരനിരയാണ് സിനിമയിൽ അണിനിരക്കുന്നത്. ഫൈസ് സിദ്ദിഖ് ചിത്രത്തിന്റെ ഛായാഗ്രഹണം നിർവ്വഹിക്കുന്നു. സംഗീതം- ജസ്റ്റിൻ വർഗീസ്, എഡിറ്റിംഗ്- മനോജ്, കലാ സംവിധാനം- ഷാജി നടുവിൽ, ആക്ഷൻ കൊറിയോഗ്രഫി- സുപ്രീം സുന്ദർ എന്നിവരാണ് മറ്റ് അണിയറ പ്രവർത്തകർ.
