ചിരഞ്ജീവി നായകനാകുന്ന പുതിയ ചിത്രമാണ് കെ എസ് രവീന്ദ്ര (ബോബി കൊല്ലി) സംവിധാനം ചെയ്യുന്ന വാള്‍ട്ടര്‍ വീരയ്യ. ആരാധകർ ഏറെ കാത്തിരിക്കുന്ന ചിത്രത്തിന്റെ ടൈറ്റില്‍ ട്രാക്ക് പുറത്തുവിട്ടിരിക്കുകയാണ് അണിയറ പ്രവർത്തകർ. ദേവി ശ്രീ പ്രസാദാണ് ചിത്രത്തിന്റെ സംഗീത സംവിധായകൻ. ചന്ദ്രബോസാണ് ടൈറ്റിൽ ട്രാക്കിന്റെ വരികൾ എഴുതിയിരിക്കുന്നത്. അനുരാഗ് കുൽക്കർണി, പവിത്ര ചാരി എന്നവർ ചേർന്നാണ് ഗാനം ആലപിച്ചിരിക്കുന്നത്.
ബോബിയുടേത് തന്നെയാണ് ചിത്രത്തിന്റെ കഥയും സംഭാഷണവും. കോന വെങ്കട്, കെ ചക്രവര്‍ത്തി റെഡ്ഡി എന്നിവര്‍ ചേര്‍ന്നാണ് തിരക്കഥ എഴുതിയിരിക്കുന്നത്. ചിരഞ്ജീവിയ്‌ക്കൊപ്പം രവി തേജ, ശ്രുതി ഹാസൻ, കാതറിൻ ട്രീസ തുടങ്ങിയ വലിയ താരനിരയാണ് ‘വാള്‍ട്ടര്‍ വീരയ്യ’യിൽ അണിനിരക്കുന്നത്. ചിരഞ്ജീവിയുടെ കരിയറിലെ 154-ാം ചിത്രമാണിത്.
മൈത്രി മൂവി മേക്കേഴ്സിന്‍റെ ബാനറില്‍ നവീന്‍ യെര്‍ണേനി, വൈ രവി ശങ്കര്‍ എന്നിവര്‍ ചേര്‍ന്നാണ് ചിത്രം നിർമ്മിക്കുന്നത്. സഹനിര്‍മ്മാണം ജി.കെ മോഹന്‍. ഛായാഗ്രാഹണം- ആര്‍തര്‍ എ വില്‍സണ്‍, ചിത്രസംയോജനം- നിരഞ്‍ജൻ ദേവറാമണെ, സംഘട്ടനം- റാം ലക്ഷ്‍മൺ, പീറ്റർ ഹെയ്ൻ എന്നിവർ നിർവ്വഹിക്കുന്നു.
