അഗ്നിപർവ്വതങ്ങളും ലാവയുമെല്ലാം നമ്മളിൽ പലർക്കും വീഡിയോകളിലൂടെയും ചിത്രങ്ങളിലൂടെയും മാത്രം കണ്ടു പരിചയമുള്ള കാര്യങ്ങളാണ്. അഗ്നിപർവ്വതങ്ങളിൽ നിന്ന് ലാവയ്ക്കരികിലേക്ക് പോവുക എന്നത് നമുക്ക് ചിന്തിക്കാൻ പോലും പറ്റുന്ന കാര്യമല്ല. കാരണം അതിലെങ്ങാൻ പെട്ടുപോയാൽ പിന്നെ ജീവനോടെ തിരിച്ചു വരിക എന്നത് അസാദ്ധ്യമാണ്. എന്നാൽ തിളച്ചുമറിയുന്ന ലാവയുടെ അരികിൽ കൂളായി നിൽക്കുന്ന ഒരു യുവാവിന്റെ വീഡിയോ ആണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്.
ഇത് എവിടെ വച്ച് ചിത്രീകരിച്ചതാണെന്നോ എന്നാണെന്നോ തുടങ്ങിയ കാര്യങ്ങളിൽ വ്യക്തതയില്ല. അതിശക്തിയിൽ ലാവ വീശിയടിക്കുന്ന പാറയിടുക്കിലൂടെ ഒരാൾ നടന്നു പോകുന്നത് വീഡിയോയിൽ കാണാം. പതിയെ ഇയാൾ തിളച്ചു മറിയുന്ന ലാവയുടെ തൊട്ടടുത്തേക്ക് നീങ്ങി നിൽക്കുന്നു. കാലൊന്ന് വഴുതിയാൽ പോലും വലിയ അപകടം സംഭവിക്കുന്ന രീതിയിലാണ് യുവാവ് നിൽക്കുന്നത്. ഹെൽമെറ്റ് അല്ലാതെ മറ്റ് സുരക്ഷാ സംവിധാനങ്ങളും ഇദ്ദേഹത്തിന്റെ പക്കലില്ല.
What it looks like at the edge of a lava ocean 😳 pic.twitter.com/XeMhIrLolx
— OddIy Terrifying (@OTerrifying) December 24, 2022
കയ്യിലെ വോക്കി ടോക്കിയിലൂടെ ഇദ്ദേഹം സന്ദേശം കൈമാറുന്നതും വ്യക്തമാണ്. ഈ വ്യക്തി പര്യവേക്ഷകനോ സൈറ്റ് ഇൻസ്പെക്ടറോ ആണെന്നാണ് പ്രാഥമിക നിഗമനം. അതേസമയം വീഡിയോയ്ക്ക് താഴെ നിരവധി പേരാണ് യുവാവിനെ വിമർശിക്കുന്നത്. സുരക്ഷാ സംവിധാനങ്ങളില്ലാതെ ലാവയുടെ ഇത്ര അടുത്ത് പോയി നിൽക്കുന്നതിനെയാണ് പലരും വിമർശിക്കുന്നത്. എന്നാൽ വീഡിയോ കൃത്രിമമാണെന്നും പലരും അഭിപ്രായപ്പെടുന്നുണ്ട്.
