വാഷിങ്ടൺ: ഇറാനുമായുള്ള യുദ്ധത്തിൽ അമേരിക്ക വിജയിച്ചാൽ എണ്ണവില കുത്തനെ കുറയുമെന്ന് യുഎസ് പ്രസിഡന്റ് ഡൊണാൾഡ് ട്രംപ്. പെട്രോൾ വില ഗാലന് മൂന്ന് ഡോളറിലേക്കും പിന്നീട് രണ്ട് ഡോളറിൽ താഴേക്കും എത്തുമെന്നും ട്രംപ് പ്രവചിച്ചു. തന്റെ ട്രൂത്ത് സോഷ്യൽ അക്കൗണ്ടിലൂടെയാണ് ട്രംപിന്റെ പ്രതികരണം.
ഇറാനുമായുള്ള സംഘർഷത്തെ തുടർന്ന് ആഗോളതലത്തിൽ ഊർജവില ഉയർന്ന സാഹചര്യത്തിലാണ് ട്രംപിന്റെ പരാമർശം. യുദ്ധത്തിൽ അമേരിക്ക വിജയിക്കുന്നതോടെ വിപണികൾ വേഗത്തിൽ സ്ഥിരത കൈവരിക്കുമെന്നും എണ്ണവില കുത്തനെ ഇടിയുമെന്നും ട്രംപ് പറഞ്ഞു.
‘എണ്ണവില കുത്തനെ ഇടിയും’
“ഇറാനുമായുള്ള യുദ്ധത്തിൽ നമ്മൾ വിജയിക്കുമ്പോൾ എണ്ണവില കുത്തനെ ഇടിയും. എല്ലാം കുറയുന്നതുപോലെ എണ്ണവിലയും കുറയും. ആദ്യം ഗാലന് മൂന്ന് ഡോളറും പിന്നീട് രണ്ട് ഡോളറിൽ താഴെയും എത്തും,” ട്രംപ് കുറിച്ചു.
ആണവായുധം സ്വന്തമാക്കാൻ ഇറാനെ അനുവദിക്കില്ലെന്നും ട്രംപ് ആവർത്തിച്ചു. കാര്യങ്ങൾ വേഗത്തിൽ അവസാനിക്കുമെന്നും ഇറാന് ഒരിക്കലും ആണവായുധം ലഭിക്കില്ലെന്നും അദ്ദേഹം വ്യക്തമാക്കി.
അതേസമയം, ഹോർമുസ് കടലിടുക്കിന് സമീപം യുഎസും ഇറാനും തമ്മിലുള്ള സംഘർഷം ശക്തമായതോടെ തിങ്കളാഴ്ച ആഗോള എണ്ണവില ആറ് ആഴ്ചയ്ക്കിടയിലെ ഉയർന്ന നിലയിലെത്തി. സമാധാനകാലത്ത് ലോകത്തെ എണ്ണ വിതരണത്തിന്റെ ഏകദേശം അഞ്ചിലൊന്ന് കടന്നുപോകുന്ന പ്രധാന എണ്ണ ഗതാഗത പാതയാണ് ഹോർമുസ് കടലിടുക്ക്. ബ്രെന്റ് ക്രൂഡ് വില ബാരലിന് ഏകദേശം 97 ഡോളറിലെത്തി. അഞ്ച് ദിവസത്തിനിടെ ഒൻപത് ശതമാനവും ഒരു മാസത്തിനിടെ 19 ശതമാനവും വില ഉയർന്നു.
ഊർജ കേന്ദ്രങ്ങൾ ആക്രമിച്ചാൽ തിരിച്ചടിക്കുമെന്ന് ഇറാൻ
ഇറാനിലെ ഊർജ സംവിധാനങ്ങൾക്കെതിരെ യുഎസ് നീക്കം നടത്തിയാൽ ശക്തമായ തിരിച്ചടിയുണ്ടാകുമെന്ന് ഇറാൻ പാർലമെന്റ് സ്പീക്കർ മുഹമ്മദ് ബഗർ ഗാലിബാഫ് മുന്നറിയിപ്പ് നൽകി. ഇറാന്റെ എണ്ണ, വാതക ഉൽപ്പാദന ശൃംഖല വ്യാപകവും എളുപ്പത്തിൽ ആക്രമിക്കാവുന്നതുമാണെന്നും അദ്ദേഹം പറഞ്ഞു.
ഇറാന്റെ ഊർജ ആസ്തികൾ ആക്രമിച്ചാൽ തിരിച്ചടിയുണ്ടാകുമെന്നും മേഖലയിലെ അമേരിക്കൻ എണ്ണ-വാതക കമ്പനികൾക്കും ഇതിന്റെ പ്രത്യാഘാതം നേരിടേണ്ടിവരുമെന്നും ഗാലിബാഫ് എക്സിലൂടെ വ്യക്തമാക്കി.
ഇറാന്റെ എണ്ണക്കപ്പൽ വ്യൂഹം പ്രതിരോധശേഷിയില്ലാത്തതാണെന്ന യുഎസ് പ്രതിരോധ സെക്രട്ടറി പീറ്റ് ഹെഗ്സത്തിന്റെ പ്രസ്താവനയ്ക്ക് പിന്നാലെയാണ് ഗാലിബാഫിന്റെ മുന്നറിയിപ്പ്.
