ലക്നൗ: ശരീരത്തിന്റെ 60 ശതമാനം ഭാഗവും രോമങ്ങളുമായി ജനിച്ച കുഞ്ഞാണ് ഇപ്പോൾ സോഷ്യൽ മീഡിയയെ അമ്പരപ്പിക്കുന്നത്. ഉത്തർപ്രദേശിലെ ഹർദോയിലായിരുന്നു പ്രത്യേക അവസ്ഥയുമായി കുഞ്ഞ് ജനിച്ചത്. തലയിൽ കൂടാതെ ശരീരത്തിന്റെ ഒട്ടുമിക്ക ഭാഗങ്ങളിലും മുടി വളർന്ന രീതിയിലായിരുന്നു കുഞ്ഞിന്റെ ജനനം.
ലോകത്ത് അപൂർവ്വമായി മാത്രം റിപ്പോർട്ട് ചെയ്യപ്പെട്ടിട്ടുള്ള Giant congenital melanocytic nevus എന്ന രോഗമാണ് കുഞ്ഞിനെ ബാധിച്ചിരിക്കുന്നതെന്ന് ഡോക്ടർമാർ പറഞ്ഞു. കുട്ടിയുടെ കഴുത്തിന് പിറകിലായി പുറം ഭാഗത്താണ് ഏറ്റവുമധികം മുടിയുള്ളത്. തന്റെ 22 വർഷത്തെ തൊഴിൽ പരിചയത്തിൽ ഇതുപോലെയൊരു സംഭവം കണ്ടിട്ടില്ലെന്ന് കുഞ്ഞിന്റെ അമ്മയെ ചികിത്സിച്ച ഡോക്ടർ പങ്കജ് മിശ്ര പ്രതികരിച്ചു.
ചർമ്മത്തിന് സംഭവിക്കുന്ന പ്രത്യേക തരം രോഗാവസ്ഥയാണിത്. മെലാനോസൈറ്റ്സ് എന്ന് പേരുള്ള സെല്ലുകളാണ് ചർമ്മത്തിൽ ഈ രോഗമുണ്ടാക്കുന്നത്. ചികിത്സയിലൂടെ രോഗം മാറ്റിയെടുക്കാമെന്ന് ആരോഗ്യ വിദഗ്ധർ സാക്ഷ്യപ്പെടുത്തുന്നു. വിദഗ്ധ ചികിത്സയ്ക്കായി കുഞ്ഞിനെ ലക്നൗവിലേക്ക് കൊണ്ടുപോകാനാണ് വീട്ടുകാരുടെ തീരുമാനം. നിലവിൽ അമ്മയ്ക്കും കുഞ്ഞിനും മറ്റ് ആരോഗ്യപ്രശ്നങ്ങളില്ലെന്നും ഡോക്ടർമാർ അറിയിച്ചു.
