മോഹൻലാലിനെ നായകനാക്കി ഷാജി കൈലാസ് സംവിധാനം ചെയ്യുന്ന ചിത്രമാണ് എലോൺ. കൊറോണ പ്രതിസന്ധിയ്ക്കിടെ ഷൂട്ട് ചെയ്ത ചിത്രമാണിത്. ഇപ്പോഴിതാ, പുതുവത്സര സമ്മാനമായി ചിത്രത്തിന്റെ ട്രെയിലർ പുറത്തിറക്കിയിരിക്കുകയാണ് അണിയറ പ്രവർത്തകർ. ഹൊറർ ചിത്രമാണോ എന്ന് തോന്നിക്കുന്ന തരത്തിലുള്ള ട്രെയിലറാണ് പുറത്തു വന്നിരിക്കുന്നത്.
ചിത്രത്തിൽ ഏക കഥാപാത്രമായാണ് മോഹൽലാൽ അഭിനയിക്കുന്നത്. മറ്റ് താരങ്ങളുടെ ശബ്ദ സാന്നിധ്യം മാത്രമാണ് സിനിമയിലുള്ളത്. പൃഥ്വിരാജ്, മഞ്ജു വാര്യർ, സിദ്ദിഖ്, മല്ലിക സുകുമാരൻ തുടങ്ങിയവരുടെ ശബ്ദങ്ങൾ ട്രെയിലറിൽ കേൾക്കാം. മാസ്കും സാനിടൈസറുമായി കൊറോണ കാലത്തെ ഐസോലേഷൻ ജീവിതത്തെ അനുസ്മരിപ്പിക്കുന്ന ചിത്രമാണിത്.
പന്ത്രണ്ട് വർഷത്തെ ഇടവേളയ്ക്ക് ശേഷമാണ് ഷാജി കൈലാസും മോഹൻലാലും ഒന്നിക്കുന്നത്. പ്രേക്ഷകരിൽ ആകാംക്ഷയുണർത്തുന്ന ട്രെയിലർ തന്നെയാണ് പുറത്തു വന്നിരിക്കുന്നത്. എന്ത് സസ്പെൻസ് ആയിരിക്കും ഷാജി കൈലാസ്-മോഹൻലാൽ കൂട്ടുകെട്ട് ഒരുക്കിയിരിക്കുന്നത് എന്നറിയാൻ ആകാംക്ഷയോടെ കാത്തിരിക്കുകയാണ് ആരാധകർ. ജനുവരി 26-ന് ചിത്രം തിയറ്ററുകളിലെത്തും.
