തിരുവനന്തപുരം: പുതുവത്സര ദിനത്തിൽ കേരളം കുടിച്ച് തീർത്തത് റെക്കോർഡ് മദ്യം. ജനുവരി ഒന്നിന് മാത്രം 107.14 കോടി രൂപയുടെ മദ്യമാണ് കേരളത്തിൽ വിൽപ്പന നടത്തിയത്. കേരളത്തിൽ ഏറ്റവും കൂടുതൽ വിറ്റഴിച്ചത് റമ്മാണ്.
തിരുവനന്തപുരം പവർ ഹൗസ് റോഡിലെ ഔട്ടലെറ്റിലായിരുന്നു ഏറ്റവും കൂടുതൽ മദ്യവിൽപന നടന്നത്. കൊല്ലം ആശ്രമം ഔട്ട്‌ലെറ്റിൽ 96.59 ലക്ഷം രൂപയുടെ മദ്യം വിറ്റു. കാസർകോഡ് ബട്ടത്തൂരിലാണ് ഏറ്റവും കുറവ് വിൽപ്പന. 10.36 ലക്ഷം രൂപയുടെ മദ്യമാണ് ഇവിടെ നിന്നും വിൽപ്പന നടത്തിയത്. സംസ്ഥാനത്തെ എല്ലാ ഔട്ട്‌ലെറ്റുകളിലും പത്ത് ലക്ഷം രൂപയ്‌ക്ക് മുകളിൽ മദ്യം പുതുവത്സര ദിനത്തിൽ വിറ്റു. വിറ്റുവരവിൽ 600 കോടി രൂപ നികുതി ഇനത്തിൽ സർക്കാരിന് ലഭിക്കും.
കഴിഞ്ഞ പത്ത് ദിവസത്തിനിടെ 686.28 കോടി രൂപയുടെ മദ്യമാണ് കേരളത്തിൽ വിറ്റത്.എന്നാൽ ക്രിസ്മസ് ദിനത്തിലെ മദ്യ വിൽപനയിൽ ഈ തവ ണ നേരിയ കുറവുണ്ടായിരുന്നു. 52.3 കോടിയുടെ മദ്യമാണ്് ക്രിസ്മസ് ദിനത്തിൽ വിറ്റത്. 2022-ലെ പുതുവത്സരദിനത്തിൽ 95.67 കോടി രൂപയുടെ മദ്യമായിരുന്നു വിൽപന നടത്തിയത്. ക്രിസ്മസ് ദിനത്തിൽ 54.82 കോടിയുടെ മദ്യവും വിൽപന നടത്തിയിരുന്നു.
