പത്തനംതിട്ട: മല്ലപ്പള്ളിയിൽ ഭക്ഷ്യവിഷബാധ ഉണ്ടായ സംഭവത്തിൽ കാറ്ററിംഗ് സ്ഥാപന ഉടമയ്‌ക്കെതിരെ കേസെടുത്തു. ചെങ്ങന്നൂർ സ്വദേശി മനുവിനെതിരെയാണ് പോലീസ് കേസെടുത്തത്. മായം ചേർക്കൽ, പൊതു ശല്യം എന്നീ വകുപ്പുകൾ പ്രകാരമാണ് കേസെടുത്തിരിക്കുന്നത്.
കഴിഞ്ഞ ദിവസമാണ് മാമോദീസ ചടങ്ങിൽ പങ്കെടുത്തവർക്ക് ഭക്ഷ്യവിഷബാധയേറ്റത്. നൂറോളം പേരാണ് ചടങ്ങിൽ പങ്കെടുത്തത്. വിരുന്നിൽ ഭക്ഷണം കഴിച്ച എഴുപതോളം പേരാണ് വയറിളക്കവും ഛർദ്ദിയും അനുഭവപ്പെട്ടതിനെ തുടർന്ന് ചികിത്സ തേടിയത്.
വിരുന്നിൽ വിളമ്പിയ മീൻ കറിയിൽ നിന്നാണ് വിഷബാധ ഉണ്ടായതെന്നാണ് വിവരം. അസ്വസ്ഥതകളെ തുടർന്ന് ആളുകൾ കൂട്ടത്തോടെ ആശുപത്രിയിൽ ചികിത്സ തേടുകയായിരുന്നു. സംശയത്തെ തുടർന്ന് ആശുപത്രി അധികൃതർ നടത്തിയ അന്വേഷണത്തിലാണ് മമോദീസ ചടങ്ങിൽ നിന്ന് കഴിച്ച ഭക്ഷണത്തിൽ നിന്നാണ് വിഷബാധയെന്ന് വ്യക്തമായത്.
ഭക്ഷ്യവിഷബാധയേറ്റതിന് പിന്നാലെ അന്വേഷണം നടത്താൻ ആരോഗ്യമന്ത്രി വീണാ ജോർജ് നിർദേശിച്ചിട്ടുണ്ട്. സംഭവത്തെ കുറിച്ച് അന്വേഷിച്ച് അടിയന്തരമായി റിപ്പോർട്ട് നൽകാൻ ഭക്ഷ്യ സുരക്ഷാ വകുപ്പ് കമ്മീഷണർക്കാണ് നിർദേശം നൽകിയത്.
