ന്യൂഡൽഹി: കേന്ദ്ര സർക്കാരിന്റെ നോട്ട് നിരോധനം ശരിവെച്ച സുപ്രീം കോടതിയുടെ ഭരണഘടന ബെഞ്ച് തീരുമാനത്തിൽ പ്രതികരണവുമായി കോൺഗ്രസ്. നോട്ട് നിരോധനം റദ്ദാക്കാനാവില്ലെന്ന് സുപ്രീം കോടതി പറഞ്ഞുവെങ്കിലും നോട്ട് നിരോധനം സുപ്രീം കോടതി ശരിവെച്ചു എന്ന് പറയാനാകില്ലെന്ന് കോൺഗ്രസ് നേതാവ് ജയറാം രമേശ് പറഞ്ഞു. അത്തരത്തിൽ പ്രചരിപ്പിക്കുന്നത് തെറ്റിദ്ധാരണാപരവും തെറ്റുമാണെന്നും ജയറാം രമേശ് പ്രസ്താവനയിൽ പറഞ്ഞു.
പാർലമെന്റിനെ വിശ്വാസത്തിലെടുക്കാതെയാണ് കേന്ദ്ര സർക്കാർ നോട്ട് നിരോധനം നടപ്പിലാക്കിയത് എന്ന് ഭിന്നവിധിയിൽ ജസ്റ്റിസ് നാഗരത്ന ചൂണ്ടിക്കാട്ടുന്നുണ്ട്. ഈ നിരീക്ഷണമാണ് വിശ്വാസത്തിലെടുക്കേണ്ടത് എന്നാണ് കോൺഗ്രസിന്റെ അഭിപ്രായമെന്നും ജയറാം രമേശ് പ്രസ്താവനയിൽ പറഞ്ഞു.
കേന്ദ്ര സർക്കാരിന്റെ 2016ലെ നോട്ട് നിരോധനം ശരിയായിരുന്നുവെന്ന് സുപ്രീം കോടതിയുടെ ഭരണഘടന ബെഞ്ചാണ് ഇന്ന് വ്യക്തമാക്കിയത്. കേന്ദ്ര സർക്കാർ എടുത്ത തീരുമാനം ആയതുകൊണ്ട് നിരോധനം ശരിയല്ലെന്ന് പറയാനാകില്ലെന്ന് ജസ്റ്റിസ് ഗവായ് വ്യക്തമാക്കി. സാങ്കേതികത്വത്തിന്റെ പേരിൽ നോട്ട് നിരോധനം റദ്ദാക്കാനാവില്ലെന്നും ഭൂരിപക്ഷ വിധിയിൽ പറയുന്നു.
അഞ്ചംഗ ബെഞ്ചിൽ ജസ്റ്റിസ് നാഗരത്ന മാത്രമാണ് ഭിന്നാഭിപ്രായം രേഖപ്പെടുത്തിയത്. നോട്ട് നിരോധനം നടപ്പിലാക്കിയ തീരുമാനത്തിലെ സാങ്കേതികത്വത്തിൽ മാത്രമാണ് ജസ്റ്റിസ് നാഗരത്ന വിയോജിപ്പ് രേഖപ്പെടുത്തിയത്. നോട്ട് നിരോധനം റദ്ദാക്കണമെന്നോ അതിന്റെ ഉദ്ദേശ്യലക്ഷ്യങ്ങൾ തെറ്റാണെന്നോ ഭിന്നവിധിയിലും പറയുന്നില്ല. ഈ സാഹചര്യത്തിലാണ് ജസ്റ്റിസ് നാഗരത്നയുടെ വിധി ഉയർത്തിക്കാട്ടി കോൺഗ്രസ് ന്യായീകരണവുമായി രംഗത്ത് വന്നിരിക്കുന്നത്.
Comments