ഡൽഹി: ലോകത്തിലെ ഏറ്റവും ഉയരം കൂടിയ യുദ്ധഭൂമിയായ സിയാച്ചിൻ പർവ്വത നിരയിൽ അതിർത്തി കാക്കാൻ ആദ്യമായി ഒരു വനിതാ ഓഫീസർ. സിയാച്ചിനിലെ കുമാർ പോസ്റ്റിലാണ് ആദ്യമായി ഒരു വനിതാ ഓഫീസറെ നിയോഗിച്ചത്. ഫയർ ആൻഡ് ഫ്യൂറി കോർപ്‌സ് ഓഫീസർ ക്യാപ്റ്റൻ ശിവ ചൗഹാൻ ആണ് സിയാച്ചിനിൽ സുരക്ഷയ്‌ക്കായി നിയോഗിക്കപ്പെട്ട ആ ധീര വനിത.
‘ഫയർ ആൻഡ് ഫ്യൂറി സംഘത്തിന്റെ ക്യാപ്റ്റൻ ശിവ ചൗഹാൻ ലോകത്തിലെ ഏറ്റവും ഉയർന്ന യുദ്ധഭൂമിയിലെ കുമാർ പോസ്റ്റിൽ പ്രവർത്തനത്തിനായി വിന്യസിക്കപ്പെട്ട ആദ്യത്തെ വനിതാ ഓഫീസറായി’ എന്ന് ഇന്ത്യൻ ആർമിയുടെ ഫയർ ആൻഡ് ഫ്യൂറി കോർപ്സിന്റെ ഔദ്യോഗിക അക്കൗണ്ട് ട്വീറ്റ് ചെയ്തു. ‘ബ്രേക്കിംഗ് ദി ഗ്ലാസ് സീലിംഗ്’ എന്ന് ശിവയുടെ നേട്ടത്തെ പ്രകീർത്തിച്ചുകൊണ്ടുള്ള കുറിപ്പും ട്വിറ്ററിൽ പോസ്റ്റ് ചെയ്തിട്ടുണ്ട്.
Captain Shiva Chauhan of Fire and Fury Sappers became the first woman officer to be operationally deployed in Kumar Post, post completion of arduous training, at the highest battlefield of the world: Fire and Fury Corps, Indian Army pic.twitter.com/79YsMUJjMJ
— ANI (@ANI) January 3, 2023
കഠിനമായ പരിശീലനത്തിന് ശേഷമാണ് കുമാർ പോസ്റ്റിൽ ശിവ ചൗഹാൻ നിയോഗിക്കപ്പെടുന്നത്. കശ്മീരിലെ തന്നെ ഏറ്റവും തണുത്തുറഞ്ഞ പ്രദേശമാണ് സിയാച്ചിന്‍. ശത്രു സൈന്യത്തിന്‍റെ ആക്രമണത്തോടും കൊടു തണുപ്പിനോടും മല്ലിടുന്നവരാണ് സിയാച്ചിനിലെ സൈനികർ. ഓക്സിജന്‍ വളരെ കുറഞ്ഞ പ്രദേശമാണിത്. 1984 മുതൽ ഇന്ത്യയും പാകിസ്താനും യുദ്ധം ചെയ്ത സ്ഥലങ്ങളിൽ വച്ച് ഏറ്റവും ഉയരം കൂടിയ യുദ്ധഭൂമിയാണ് സിയാച്ചിൻ ഹിമാനികൾ. 15,632 അടി ഉയരത്തിലാണ് സിയാച്ചിനിലെ കുമാർ പോസ്റ്റ് സ്ഥിതി ചെയ്യുന്നത്.
