കോട്ടയം: വിവാദ പരാമർശത്തിന് ശേഷം മന്ത്രി വി.എൻ.വാസവനുമായി വേദി പങ്കിട്ട് നടൻ ഇന്ദ്രൻസ്. മന്ത്രിയോട് തനിക്ക് പിണക്കമൊന്നുമില്ല എന്ന് നടൻ പറഞ്ഞു. ഇന്ദ്രൻസ് കലാകേരളത്തിന്റെ അഭിമാനമാണെന്ന് മന്ത്രിയും പ്രശംസിച്ചു. പാമ്പാടിയിലെ സ്വകാര്യ സ്കൂളിന്റെ വാർഷിക ചടങ്ങിലാണ് മന്ത്രിയുടെ ക്ഷണപ്രകാരം ഇന്ദ്രൻസ് എത്തിയത്.
വിവാദ പരാമർശത്തിന് ശേഷം ഇന്ദ്രൻസിനെ വാനോളം പുകഴ്‌ത്തിയാണ് മന്ത്രി വേദിയിൽ സംസാരിച്ചത്. ‘പ്രിയങ്കരനായ ഇന്ദ്രൻസ് കലാകേരളത്തിന്റെ അഭിമാനവും ഇന്നത്തെ സിനിമകളിൽ ഏറ്റവും ശ്രദ്ധേയമായ വേഷങ്ങൾ ചെയ്യുന്ന നടനുമാണ്. മറക്കാനാകാത്ത ധാരാളം വേഷങ്ങൾ നമുക്ക് മുന്നിലേയ്‌ക്ക് എത്തുന്നു’ എന്നിങ്ങനെ നീണ്ടു മന്ത്രിയുടെ പ്രശംസ. തനിക്ക് മന്ത്രിയോട് പിണക്കമില്ലെന്നായിരുന്നു ഇന്ദ്രൻസ് വേദിയിൽ പറഞ്ഞത്.
‘ഈ പരിപാടിൽ മന്ത്രി ക്ഷണിച്ചതിൽ സന്തോഷമുണ്ട്. മന്ത്രിയോട് എനിക്ക് ഒരു പിണക്കവും ഇല്ല. അത് ഈ വേദിയിൽ പറയേണ്ടതുണ്ട്. ഞങ്ങൾ കുറച്ച് മുന്നേ ജനിച്ചവരായതു കൊണ്ട് പുതിയ തലമുറ സൂക്ഷിക്കുന്നതു പോലെ ചിലപ്പോൾ വാക്കുകൾ സൂക്ഷിക്കാൻ കഴിഞ്ഞന്നു വരില്ല. പക്ഷെ ഒരുപാട് ശ്രദ്ധിക്കുന്നുണ്ട്’ എന്നാണ് ഇന്ദ്രൻസ് പറഞ്ഞത്.
