നവാഗതനായ വിഷ്ണു ശശി ശങ്കറിന്റെ സംവിധാനത്തിൽ ഒരുങ്ങിയ ഭക്തിസാന്ദ്രമായ ചിത്രമാണ് മാളികപ്പുറം. ശബരിമലയുടെ പശ്ചാത്തലത്തിൽ ഒരുക്കിയ ചിത്രത്തിൽ നായക വേഷത്തിൽ എത്തിയത് ഉണ്ണി മുകുന്ദനാണ്. തിയേറ്ററുകളിൽ മികച്ച വിജയം കരസ്ഥമാക്കികൊണ്ടിരിക്കുന്ന ചിത്രം ആരാധകർ ഇരുകൈയ്യും നീട്ടിയാണ് സ്വീകരിച്ചത്. എന്നാൽ ഇപ്പോഴിതാ ശബരിമല പ്രമേയമായി മറ്റൊരു ബഹുഭാഷാ ചിത്രവും നിർമ്മാണ പ്രവർത്തനങ്ങളിലേക്ക് ചുവടുവയ്ക്കുകയാണ്. രാജീവ് വൈദ്യയുടെ സംവിധാനത്തിൽ അരങ്ങേറുന്ന ചിത്രത്തിന് പേരിട്ടിരിക്കുന്നത് സന്നിധാനം പി.ഒ എന്നാണ്.
സർവത സിനി ഗാരേജ്, ഷിമോഗ ക്രിയേഷൻസ് എന്നീ ബാനറുകളിലാണ് ചിത്രം നിർമ്മിക്കുന്നത്. മധുസൂദർ റാവൂ, ഷബീർ പത്താൻ എന്നിവർ ചേർന്നാണ് ചിത്രത്തിന്റെ നിർമ്മാണ പ്രവർത്തനങ്ങൾ നിർവഹിക്കുന്നത്. ചിത്രത്തിൽ കേന്ദ്ര കഥാപാത്രങ്ങളായി അവതരിക്കുന്നത് യോഗി ബാബുവും പ്രമോദ് ഷെട്ടിയുമാണ്. പാൻ ഇന്ത്യൻ ചിത്രമായി അവതരിപ്പിക്കുന്ന സിനിമയായി തമിഴ്, മലയാളം, കന്നട, തെലുങ്ക്, ഹിന്ദി എന്നീ ഭാഷകളിലായാണ് പ്രേക്ഷകർക്ക് മുന്നിൽ പ്രദർശനത്തിനെത്തുക. ജനുവരി 14 മകരസംക്രമ ദിനത്തിൽ സന്നിധാനത്ത് വച്ച് ചിത്രത്തിന്റെ പ്രാരംഭ പൂജ ചടങ്ങുകൾ നടക്കും.
അതേസമയം, കേരളത്തിൽ മാളികപ്പുറം റിലീസ് ചെയ്ത് രണ്ടാം വാരത്തിലെത്തി നിൽക്കുമ്പോഴും സ്ക്രീൻ കൗണ്ടിൽ മികച്ച വർദ്ധനവാണ് ഉളളത്. ആദ്യ വാരത്തിൽ 140 തിയറ്ററുകളിൽ റിലീസ് ചെയ്ത ചിത്രം രണ്ടാം വാരത്തിലേക്ക് കടന്നതോടു കൂടി 30 സ്ക്രീനുകൾ കൂടി വർദ്ധിപ്പിച്ചിട്ടുണ്ട് എന്നത് ചിത്രത്തിന്റെ വിജയമാണ്. കല്ല്യാണി എന്ന എട്ടു വയസ്സുകാരി പെൺകുട്ടിയുടെയും അവളുടെ സൂപ്പർ ഹീറോ ആയ അയ്യപ്പന്റെയും കഥയാണ് ചിത്രത്തിന്റെ ഇതിവൃത്തം. ബാലതാരം ദേവനന്ദനയാണ് കേന്ദ്ര കഥാപാത്രത്തെ അവതരിപ്പിച്ചിരിക്കുന്നത്.
ആന്റോ ജോസഫിന്റെ ഉടമസ്ഥതയിലുളള ആൻ മെഗാ മീഡിയയും വേണു കുന്നപ്പളളിയുടെ ഉടമസ്ഥതയിലുളള കാവ്യ ഫിലിം കമ്പനിയും ഒരുമിച്ചാണ് ചിത്രം ഒരുക്കിയിരിക്കുന്നത്. പ്രിയ വേണു, നീതാ പിന്റോ എന്നിവരാണ് ചിത്രം നിർമ്മിച്ചിരിക്കുന്നത്. പത്താം വളവ്, നൈറ്റ് ഡ്രൈവ്, കടാവർ എന്നീ ശ്രദ്ധേയമായ ചിത്രങ്ങൾക്കു ശേഷം അഭിലാഷ് പിളളയുടെ തിരക്കഥയിൽ ഒരുങ്ങിയ ചിത്രമാണ് മാളികപ്പുറം. സൈജു കുറുപ്പ്, ഇന്ദ്രൻസ്, മനോജ് കെ ജയൻ, രമേശ് പിഷാരടി , സമ്പത്ത് റാം എന്നിവരാണ് ചിത്രത്തിൽ മറ്റു പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. സംവിധായകൻ തന്നെ എഡിറ്റിംഗും നിർവഹിക്കുന്ന ചിത്രത്തിന്റെ ഛായാഗ്രഹകൻ വിഷ്ണു നാരായണൻ ആണ്.
