മാളികപ്പുറം സിനിമയുടെ വിജയത്തിൽ സന്തോഷം പങ്കുവച്ച് ഉണ്ണി മുകുന്ദൻ. സുദീർഘമായ കുറിപ്പ് ഫേസ്ബുക്കിൽ രേഖപ്പെടുത്തിയാണ് അദ്ദേഹം പ്രേക്ഷകർക്ക് നന്ദിയറിയിച്ചത്. സിനിമയുടെ വിജയത്തിന് കാരണമായ ഓരോ അണിയറ പ്രവർത്തകരുടെയും പേര് എടുത്ത് പറഞ്ഞായിരുന്നു ഉണ്ണി മുകുന്ദന്റെ പ്രതികരണം.
വാക്കുകൾ കൊണ്ട് പറയാനോ പ്രകടിപ്പിക്കാനോ കഴിയാത്തത്ര സന്തോഷത്തിലൂടെയാണ് ഇപ്പോൾ കടന്നു പോകുന്നതെന്നും മാളികപ്പുറം സിനിമ ഇത്രയും വലിയ വിജയമാക്കി തന്ന അയ്യപ്പ സ്വാമിയോടും സിനിമയെ ഇരുകൈയ്യും നീട്ടി സ്വീകരിച്ച പ്രേക്ഷകരോടും സ്നേഹവും നന്ദിയും അറിയിക്കുന്നുവെന്നും അദ്ദേഹം പറഞ്ഞു. സിനിമയെ പറ്റിയുള്ള ഒരുപാട് നല്ല പ്രതികരണങ്ങൾ വായിക്കാൻ കഴിഞ്ഞു. സിനിമാ ജീവിതത്തിൽ ഇങ്ങനെ ആദ്യമായിട്ടാണ്, ഇതിനു മുൻപും തന്റെ സിനിമകൾ പ്രേക്ഷക പ്രീതി നേടിയിട്ടുമുണ്ടെങ്കിലും മാളികപ്പുറത്തിന് ലഭിച്ച അത്രയും വരില്ല. സിനിമ പ്രേക്ഷകരിലേക്കെത്തിച്ച നിർമ്മാതാക്കളായ ആന്റോ ചേട്ടനോടും വേണുച്ചേട്ടനോടും ഒരിക്കൽ കൂടി നന്ദിയും പറയുന്നു.
ഈ കുറിപ്പ് എഴുതാനുള്ള പ്രധാന കാര്യം താൻ ചെയ്തുകൊണ്ടിരുന്ന തെലുങ്ക് ചിത്രത്തിന്റെ ഡേറ്റ് ഇഷ്യൂവും മറ്റ് ചില സാങ്കേതിക കാരണങ്ങൾ കൊണ്ടും ഒരുപക്ഷെ മാളികപ്പുറം സിനിമ ഒഴിവാക്കേണ്ടി വരുമായിരുന്നു. എന്നാൽ എല്ലാ തടസങ്ങൾക്കും പരിഹാരം കണ്ടെത്തി മാളികപ്പുറത്തിലേക്ക് തന്നെ അടുപ്പിച്ചത് മേപ്പടിയാന്റെ സംവിധായകനും പ്രിയ സുഹൃത്തുമായ വിഷ്ണു മോഹനും, മാനേജറും സഹോദര തുല്യനുമായ വിപിനും കൂടിയാണ്. അതുകൊണ്ട് തന്നെ മാളികപ്പുറം മൂലം തനിക്ക് കിട്ടിക്കൊണ്ടിരിക്കുന്ന സ്നേഹവും നല്ല സന്ദേശങ്ങളും ഇവർക്കും അർഹതപ്പെട്ടതാണെന്ന് ഉണ്ണി മുകുന്ദൻ പറഞ്ഞു.
സിനിമയുടെ ചിത്രികരണത്തിന് ശേഷം മാളികപ്പുറത്തിന്റെ നട്ടെല്ലായിമാറിയത് പ്രിയ സുഹൃത്തും സിനിമയുടെ എഡിറ്ററുമായ ഷമീർ മുഹമ്മദ് ആയിരുന്നു. സിനിമ പ്രേക്ഷക മനസ്സിലേക്ക് ഇത്രയുമധികം ആഴത്തിൽ പതിയാൻ കാരണം അദ്ദേഹത്തിന്റെ എഡിറ്റിംഗ് മികവ് തന്നെയാണ്. ഷമീറിന് ഒരായിരം നന്ദിയുണ്ടെന്നും ഉണ്ണി മുകുന്ദൻ രേഖപ്പെടുത്തി.
അഞ്ച് വർഷങ്ങൾക്ക് ശേഷം വലിയ ഒരു ഫൈറ്റിംഗ് രംഗങ്ങളെപ്പറ്റി ആലോചിച്ച് തുടങ്ങിയപ്പോൾ തന്നെ അത് ഏറ്റവും മികച്ചതാവണമെന്ന് തനിക്ക് നിർബന്ധമുണ്ടായിരുന്നു. അത് സിൽവ മാസ്റ്റർ ഉള്ളതു കൊണ്ട് മാത്രമാണ് സാധിച്ചത്. സിനിമയെയും അതിലെ കഥാപാത്രങ്ങളെയും പൂർണ്ണമായി മനസിലാക്കി സിൽവ മാസ്റ്റർ ഏറ്റവും മികച്ച രീതിയിൽ തന്നെ സംഘട്ടനം കമ്പോസ് ചെയ്തു തന്നു. ഫൈറ്റിംഗ് സീനുകൾക്ക് തിയേറ്ററിൽ രോമാഞ്ചം സൃഷ്ട്ടിക്കാൻ സാധിച്ചിട്ടുണ്ടെങ്കിൽ അതിന്റെ മുഴുവൻ ക്രെഡിറ്റും മാസ്റ്റർക്കാണെന്നും നടൻ വ്യക്തമാക്കി.
സിനിമയിലെ ഓരോ അണിയറ പ്രവർത്തകരെ പറ്റിയും എടുത്തു പറയാതെ മാളികപ്പുറത്തിന്റെ വിജയം ഉൾകൊള്ളാൻ സാധിക്കുകയില്ല. കാരണം ഈ വിജയം അവരുടെയും കൂടെ കഠിനപ്രയത്നത്തിന്റെ ഫലമാണ്. പല വേദികളിലും അവരെ കുറിച്ച് മുൻപ് പറഞ്ഞിട്ടുള്ളതിനാൽ ഇവിടെ പ്രത്യേകമായി എടുത്ത് പറയുന്നില്ലെന്നും ഉണ്ണി ഫേസ്ബുക്കിൽ എഴുതി.
Comments