മെൽബൺ: അഫ്ഗാനിസ്ഥാനിനെതിരായ ഏകദിന പരമ്പരയിൽ നിന്നും പിന്മാറുന്നതായി അറിയിച്ച് ഓസ്ട്രേലിയൻ ക്രിക്കറ്റ് ടീം. താലീബാൻ സർക്കാരിന്റെ സ്ത്രീ വിരുദ്ധ നിലപാടിൽ പ്രതിഷേധിച്ചാണ് പിന്മാറ്റം. ഓസ്ട്രേലിയൻ സർക്കാരുമായി നടത്തിയ ചർച്ചയ്ക്ക് ശേഷമാണ് ഇത്തരമൊരു തീരുമാനം ക്രിക്കറ്റ് ബോർഡ് സ്വീകരിച്ചത്. മാർച്ചിൽ യുഎഇയിൽ നടക്കാനിരുന്ന മത്സരങ്ങളാണ് ഉപേക്ഷിച്ചിരിക്കുന്നത്.
സംഭവത്തിൽ പ്രതിഷേധിച്ച് പ്രമുഖ അഫ്ഗാൻ ഓൾറൗണ്ടർ റാഷിദ് ഖാൻ രംഗത്തുവന്നു. ക്രിക്കറ്റ് ഓസ്ട്രേലിയയുടെ തീരുമാനം തന്നെ നിരാശപ്പെടുത്തിയെന്ന് വ്യക്തമാക്കിയ റാഷിദ് ഓസ്ട്രേലിയൻ ടി20 ടൂർണമെന്റായ ബിഗാബാഷ് ലീഗിൽ നിന്നും പിന്മാറുമെന്ന സൂചനയും നൽകി. നിലവിൽ അഡ്ലെയ്ഡ് സ്ട്രൈക്കേർസിലെ താരമാണ് റാഷിദ്.
അമേരിക്കൻ സൈനിക പിന്മാറ്റത്തിന് പുറകെ അഫ്ഗാനിസ്ഥാനിലെ ഭരണം കൈക്കലാക്കിയ താലീബാൻ കടുത്ത അടിച്ചമർത്തലാണ് രാജ്യത്തെ സ്ത്രീകൾക്ക് നേരെ നടത്തുന്നത്. ബുർഖ നിർബന്ധമാക്കിയ ഭരണകൂടം സ്ത്രീകളെ യൂണിവേഴ്സിറ്റികളിൽ വിലക്കി. നടപടിക്കെതിരെ ലോകരാഷ്ട്രങ്ങൾ പ്രതിഷേധവുമായി രംഗത്തുവന്നിരുന്നു.
