തെലുങ്ക് സൂപ്പർസ്റ്റാർ നന്ദമൂരി ബാലകൃഷ്ണ നായകനായ ഏറ്റവും പുതിയ ചിത്രമാണ് വീരസിംഹ റെഡ്ഡി. തെലുങ്ക് സിനിമാ പ്രേമികൾക്കിടയിലും ആരാധകർക്കിടയിലും തരംഗമാകുകയാണ് ചിത്രം. ബാലയ്യ ആരാധകർക്ക് ആഘോഷിക്കാനുള്ള എല്ലാ ചേരുവകളും ചേർത്ത് മുഴുനീള മാസ് മസാല ചിത്രമായാണ് വീരസിംഹ റെഡ്ഡി തിയറ്ററിൽ എത്തിയിരിക്കുന്നത്. ഇപ്പോഴിതാ, ചിത്രത്തിലെ അതിമാനുഷിക മാസ് രംഗമാണ് സമൂഹമാദ്ധ്യമങ്ങളിൽ ശ്രദ്ധ നേടുന്നത്. പാഞ്ഞു വരുന്ന തീവണ്ടി വരെ തടഞ്ഞു നിർത്തുന്ന നന്ദമൂരി ബാലകൃഷ്ണയുടെ വീഡിയോകൾ മലയാളികൾ ട്രോളുകളുടെ രൂപത്തിൽ അസ്വദിക്കാറുണ്ട്. ആ കൂട്ടത്തിലേയ്ക്ക് പുതിയ ഒരെണ്ണം കൂടി കിട്ടിയതിന്റെ സന്തോഷത്തിലാണ് ട്രോളന്മാർ.
ഒറ്റ ചവിട്ടിന് കാർ ആകാശത്തേക്ക് പൊക്കി നിർത്തുകയും, വന്ന വരവിൽ തന്നെ കാർ പിന്നിലേയ്ക്ക് പോകുന്നതുമാണ് സമൂഹമാദ്ധ്യമങ്ങളിൽ ശ്രദ്ധ നേടുന്ന രംഗം. പിന്നാലെ, വീണ്ടും ട്രോളുകളിൽ നിറയുകയാണ് ബാലയ്യ. പൊങ്കൽ റിലീസായി ജനുവരി 12-നാണ് ചിത്രം തിയറ്ററുകളിലെത്തിയത്. 32 കോടിയാണ് ചിത്രം ആദ്യ ദിനം തന്നെ വാരിക്കൂട്ടിയത്. രചനയും സംവിധാനവും ഗോപിചന്ദ് മലിനേനിയാണ്.
What A Movie
Goosebumps every scene#VeeraSimhaReddy #VeeraSimhaReddyOnJan12th pic.twitter.com/z7o3KU5ESJ— RUTHMAN (@ruthvikesh) January 12, 2023
ശ്രുതി ഹാസൻ നായികയാവുന്ന ചിത്രത്തിൽ മലയാളത്തിൽ നിന്ന് ഹണി റോസും ലാലും പ്രധാന കഥാപാത്രങ്ങളെ അവതരിപ്പിക്കുന്നുണ്ട്. വരലക്ഷ്മി ശരത്കുമാർ, ദുനിയ വിജയ്, പി. രവി ശങ്കർ എന്നിവരാണ് മറ്റ് അഭിനേതാക്കൾ. മൈത്രി മൂവി മേക്കേഴ്സ് നിർമ്മിച്ചിരിക്കുന്ന സിനിമ, നന്ദമൂരി ബാലകൃഷ്ണയുടെ നൂറ്റിയേഴാം ചിത്രമാണ്. ഛായാഗ്രഹണം ഋഷി പഞ്ചാബിയും എഡിറ്റിംഗ് നവീൻ നൂലിയും നിർവ്വഹിക്കുന്നു. വെങ്കട്, റാം- ലക്ഷ്മൺ ടീമാണ് സംഘട്ടനം ഒരുക്കിയിരിക്കുന്നത്.
