വിരമിക്കൽ സൂചന നൽകി ടെന്നീസ് താരം സാനിയ മിർസ. വരുന്ന ഓസ്ട്രേലിയൺ ഓപ്പണിന് ശേഷം നടക്കുന്ന ദുബായ് ഓപ്പണോടെ കരിയർ അവസാനിപ്പിക്കുകയാണെന്ന സൂചനയാണ് താരം നൽകിയത്. ജനുവരി 16ന് ടൂർണമെന്റ് തുടങ്ങാനിരിക്കെയാണ് സാനിയയുടെ പ്രതികരണം.
അത്യുജ്ജലമായിരുന്ന കരിയറിനെക്കുറിച്ച് ഹൃദയാർദ്രമായ കുറിപ്പാണ് സാനിയ (36) സമൂഹമാദ്ധ്യമത്തിലൂടെ പങ്കുവച്ചിരിക്കുന്നത്. ഹൈദരാബാദിലെ നിസാം ക്ലബ്ബിൽ വച്ച് 6-ാം വയസിൽ തുടങ്ങിയ ടെന്നീസ് ജീവിതത്തിന് തിരശീല വീഴുകയാണെന്ന് സാനിയ സൂചന നൽകി. ഈ കരിയറിൽ തനിക്ക് സകല പിന്തുണയും നൽകിയ ടീമിനും കുടുംബത്തിനും നന്ദിയുണ്ടെന്നും സാനിയ പറഞ്ഞു.
“ആറാം വയസിൽ തുടങ്ങിയ പോരാട്ടം അവസാനഘട്ടത്തിൽ എത്തി നിൽക്കവെ കണ്ണുകൾ നിറയുകയാണ്. ജീവിതം മുന്നോട്ട് പോവുക തന്നെ വേണം. ഇത് ഒന്നിന്റെയും അവസാനമായി കാണുന്നില്ല. ഇനിയുമേറെ വ്യത്യസ്തമായ ഓർമ്മകൾ കെട്ടിപ്പടുക്കാനുണ്ട്. അതിന്റെ തുടക്കം മാത്രമാണിത്. സ്വപ്നങ്ങൾ സാക്ഷാത്കരിക്കുക തന്നെ വേണം. പുതിയ ലക്ഷ്യങ്ങൾ സജ്ജമാക്കണം. കുഞ്ഞിന് തന്നെ ഏറ്റവുമധികം ആവശ്യമുള്ള സമയമാണിത്. എനിക്കിതുവരെ അവന് നൽകാൻ കഴിഞ്ഞതിൽ കൂടുതൽ സമയം ഇനി നൽകണം. ഇത് പുതിയ തുടക്കങ്ങളാണ്.. ഈ മത്സരവും ആഘോഷിക്കാൻ തയ്യാറായി കഴിഞ്ഞു. സ്നേഹം.” സാനിയ ട്വിറ്ററിൽ കുറിച്ചു.
രണ്ട് പതിറ്റാണ്ടോളം നീണ്ട സാനിയയുടെ കരിയറിൽ ആറ് ഗ്രാൻസ്ലാം കിരീടമാണ് താരം നേടിയിട്ടുള്ളത്. വിരമിക്കൽ സൂചന യാഥാർത്ഥ്യമാവുകയാണെങ്കിൽ തിങ്കളാഴ്ച മുതൽ ആരംഭിക്കാനിരിക്കുന്ന ഓസ്ട്രേലിയൺ ഓപ്പണാകും സാനിയയുടെ കരിയറിലെ അവസാന ഗ്രാൻസ്ലാം ടൂർണമെന്റ്.
