തിരുവനന്തപുരം: അവസാന മത്സരത്തിലും ഉജ്ജ്വല വിജയം കരസ്ഥമാക്കി പരമ്പര തൂത്തുവാരിയ ഇന്ത്യൻ ടീമിന് ആശംസകളുമായി മുഖ്യമന്ത്രി പിണറായി വിജയൻ. ബാറ്റ് കൊണ്ടും പന്തുകൊണ്ടും ഇന്ത്യൻ ടീം നിറഞ്ഞാടിയപ്പോൾ ഏകദിന ക്രിക്കറ്റ് ചരിത്രത്തിലെ ഏറ്റവും മികച്ച വിജയമാണ് ഗ്രീൻഫീൽഡ് സ്റ്റേഡിയത്തിൽ രചിക്കപ്പെട്ടതെന്ന് അദ്ദേഹം പറഞ്ഞു. അക്ഷരാർത്ഥത്തിൽ ക്രിക്കറ്റ് കാർണിവൽ തന്നെയായിരുന്നു ഗ്രീൻഫാൽഡ് സ്റ്റേഡിയത്തിൽ നടന്നതെന്നും അദ്ദേഹം ഇൻസ്റ്റഗ്രാമിൽ കുറിച്ചു.
തന്റെ 46-ാം സെഞ്ച്വറി കരസ്ഥമാക്കിയ കോഹ്ലി സച്ചിന്റെ റെക്കോർഡ് നേട്ടത്തിന് അരികിലാണെന്നും മുഖ്യമന്ത്രി ഓർമ്മിപ്പിച്ചു. റെക്കോർഡിലേക്ക് കുതിക്കുന്ന വിരാട് കോഹ്ലിക്ക് ആശംസകൾ നേരുന്നതായും അദ്ദേഹം പറഞ്ഞു.
”കാര്യവട്ടം ഗ്രീൻഫീൽഡ് സ്റ്റേഡിയത്തിൽ ഇന്ന് അക്ഷരാർത്ഥത്തിൽ ക്രിക്കറ്റ് കാർണിവൽ തന്നെയായിരുന്നു. ബാറ്റ് കൊണ്ടും പന്തുകൊണ്ടും ഇന്ത്യൻ ടീം നിറഞ്ഞാടിയപ്പോൾ ഏകദിന ക്രിക്കറ്റ് ചരിത്രത്തിലെ റൺ അടിസ്ഥാനത്തിലുള്ള ഏറ്റവും മികച്ച വിജയമാണ് ഗ്രീൻഫീൽഡ് സ്റ്റേഡിയത്തിൽ രചിക്കപ്പെട്ടത്. ശ്രീലങ്കയ്ക്കെതിരായ മൂന്നാം ഏകദിന മത്സരത്തിൽ 317 റൺസിന്റെ കൂറ്റൻ വിജയമാണ് ടീം ഇന്ത്യ നേടിയത്. ഇതോടെ 2008 ൽ അയർലണ്ടിനെതിരെ ന്യൂസിലാൻഡ് നേടിയ 290 റൺസിന്റെ റെക്കോർഡ് ജയം പഴങ്കഥയായി. വിരാട് കോഹ്ലിയുടെ നേതൃത്വത്തിൽ ഇന്ത്യൻ ബാറ്റർമാർ റൺമഴ പെയ്യിച്ചപ്പോൾ 3-0 നാണ് ഇന്ത്യ പരമ്പര തൂത്തുവാരിയത്. തന്റെ 46 ആം അന്താരാഷ്ട്ര ഏകദിന സെഞ്ച്വറിയാണ് വിരാട് കോഹ്ലി ഇന്ന് പൂർത്തിയാക്കിയത്. സച്ചിൻ ടെണ്ടുൽക്കറുടെ 49 സെഞ്ച്വറികളുടെ റെക്കോർഡിനൊപ്പമെത്താൻ കേവലം മൂന്ന് സെഞ്ച്വറി കൂടി മതി കോഹ്ലിക്ക്. റെക്കോർഡിലേക്ക് കുതിക്കുന്ന വിരാട് കോഹ്ലിക്കും ടീം ഇന്ത്യക്കും ആശംസകൾ”. മുഖ്യമന്ത്രി ഇൻസ്റ്റഗ്രാമിൽ കുറിച്ചു.
എന്നാൽ മത്സരത്തിന് കാണികൾ എത്താതിരുന്നതിനെക്കുറിച്ച് അദ്ദേഹം ഇതുവരെ പ്രതികരിച്ചിട്ടില്ല. മന്ത്രിയുടെ വിവാദ പരാമർശത്തിലും അദ്ദേഹം മൗനം തുടരുകയാണ്.
