പത്തനംതിട്ട: ഗ്യാസ് സിലിണ്ടർ പൊട്ടിത്തെറിച്ച് എട്ട് പേർക്ക് പരിക്കേറ്റു. പത്തനംതിട്ട സെൻട്രൽ ജംഗ്ഷനിലുള്ള ബേക്കറി കടയിലാണ് അപകടമുണ്ടായത്. സമീപത്തെ നാല് കടകൾക്ക് സ്ഫോടനത്തെ തുടർന്ന് തീപിടിച്ചിരുന്നു.
മൂന്ന് സിലിണ്ടറുകളായിരുന്നു പൊട്ടിത്തെറിച്ചത്. അഗ്നിബാധയുണ്ടായതിന് പിന്നാലെ ബേക്കറിയിലെയും സമീപത്തെ കടകളിലെയും ജീവനക്കാർ ഇറങ്ങിയോടി. പരിക്കേറ്റവരുടെ നില ഗുരുതരമല്ലെന്നാണ് വിവരം. ഇവരെ പത്തനംതിട്ട ജനറൽ ആശുപത്രിയിലാണ് പ്രവേശിപ്പിച്ചത്.
പത്തനംതിട്ടയിൽ ഉച്ചയ്ക്ക് ഒന്നരയോടെയായിരുന്നു അപകടമുണ്ടായത്. സമീപമുണ്ടായിരുന്ന മറ്റ് രണ്ട് ബേക്കറികളും ഒരു മൊബൈൽ ഷോപ്പും അപകടത്തിൽ കത്തി നശിച്ചിട്ടുണ്ട്. രണ്ട് മണിക്കൂറോളം നീണ്ട പരിശ്രമത്തിനൊടുവിലാണ് തീ പൂർണമായും നിയന്ത്രണ വിധേയമാക്കാനായതെന്ന് പോലീസ് അറിയിച്ചു.
Comments