ലക്നൗ : ലോക്സഭ തിരഞ്ഞെടുപ്പിന് മുന്നോടിയായി ബിജെപി സംസ്ഥാന പ്രവർത്തക സമിതി സമ്മേളനം ഇന്ന് ലക്നൗവിൽ വച്ച് നടക്കും. ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ചടങ്ങിനെ അഭിസംബോധന ചെയ്യും. സംസ്ഥാനം-ജില്ല-മണ്ഡല ഉപരി പ്രവർത്തകർ പ്രവർത്തക സമിതി യോഗത്തിൽ പങ്കെടുക്കുമെന്ന് ബിജെപി ഉത്തർപ്രദേശ് അദ്ധ്യക്ഷൻ ഭൂപേന്ദ്ര സിംഗ് ചൗധരി അറിയിച്ചു.
ഭാരവാഹികൾ ഉൾപ്പടെ സംസ്ഥാനത്ത് നിന്ന് 700-ൽ അധികം പ്രതിനിധികൾ പങ്കുചേരും. കർമ്മ പദ്ധതികളെ കുറിച്ച് ചർച്ചകൾ നടത്തുമെന്നും ഇത് വരെ നടപ്പിലാക്കിയ പദ്ധതികളെ കുറിച്ച് അവലോകനം നടത്തുമെന്നും അദ്ദേഹം പറഞ്ഞു. ഒരു ദിവസം നീളുന്ന യോഗത്തിൽ രാഷ്ട്രീയ പ്രമേയവും പാസ്സാക്കുമെന്ന് അദ്ദേഹം കൂട്ടിച്ചേർത്തു. ഫെബ്രുവരി 5-ന് മുൻപ് 98 പ്രവർത്തക സമിതി യോഗങ്ങളും ഫെബ്രുവരി 12-ന് മുൻപ് 1900 മണ്ഡല തല യോഗങ്ങളും പാർട്ടി സംഘടിപ്പിക്കുമെന്നും അദ്ദേഹം അറിയിച്ചു.
ബിജെപി ദേശീയ നിർവാഹക സമിതി യോഗം ജനുവരി 16-17 തീയതികളിൽ ന്യൂഡൽഹിയിൽ വച്ച് നടന്നിരുന്നു. സമിതിയിൽ പ്രധാനമന്ത്രി നരേന്ദ്ര മോദിയും ബിജെപി ദേശീയ പ്രസിഡന്റ് ജെപി നദ്ദയും പാർട്ടി പ്രവർത്തകർക്ക് ആവശ്യമായ മാർഗ്ഗ നിർദേശങ്ങൾ നൽകിയതായി ചൗധരി വ്യക്തമാക്കി.
Comments